ગત મહિને ૮ એપ્રિલના રોજ સૌપ્રથમ કચ્છખબરે વાયરલ વીડિયોના આધારે સમાચાર પ્રગટ કરેલાં. માંડવીના આઝાદ ચોકમાં હોમગાર્ડ જવાનની હાજરીમાં એક નિર્દોષ નેપાળી યુવકને ત્રણ શખ્સો લાકડી વડે નિર્દયતાપૂર્વક ઢોર માર મારતાં હતા. કચ્છખબરના અહેવાલના બીજા દિવસે માંડવી પોલીસે ત્રણ અજાણ્યા શખ્સો અજાણ્યા યુવકને અજ્ઞાત કારણોસર માર મારતાં હોવાની સરકાર તરફે ફરિયાદ નોંધી હતી.

હકીકતમાં આ બનાવ પાંચમી એપ્રિલની રાત્રિનો હતો અને બનાવ બન્યા બાદથી પીડિત યુવક માંડવી પોલીસના કબજામાં હોવાનું બહાર આવેલું. એટલું જ નહીં, માંડવી પોલીસ ગુપચૂપ રીતે પીડિત યુવકને જાપ્તા સાથે ૬ઠ્ઠી અને ૭મી એપ્રિલે ભુજની માનસિક આરોગ્યની હોસ્પિટલમાં તેના માનસિક આરોગ્યનો અભિપ્રાય જાણવા લઈ આવેલી. હોસ્પિટલે યુવકના સગાં-સંબંધીને મળ્યાં વગર તથા મેજિસ્ટ્રેટના હુકમ વગર કોઈ અભિપ્રાય આપવાનો ઈન્કાર કરી દીધો હતો.

સંસ્થાના સંચાલકોએ પોલીસ પાસે યુવકનો કબજો સુપ્રત કર્યાનું વિધિવત્ લખાણ આપવાનો આગ્રહ કરતાં ૧૩મી એપ્રિલે પોલીસની સૂચનાથી કેટલાંક લોકો આ યુવકને સંસ્થામાંથી પરત લઈ ગયાં હતા. આ યુવક કોણ છે અને ક્યાં છે તે અંગે શરૂઆતથી જ પોલીસ મૌન છે.

કચ્છખબરના સમાચારોના પગલે કચ્છ અને ગુજરાતના અનેક જાગૃત નાગરિકો, એડવોકેટસ, પૂર્વ જજીસ, નિવૃત્ત આઈપીએસ ઑફિસર્સ સહિતના સુજ્ઞ નાગરિકોએ આ મામલે ગુજરાત હાઈકૉર્ટ, સુપ્રીમ કૉર્ટ, નેશનલ હ્યુમન રાઈટ્સ કમિશન, નેપાળ એમ્બેસી, માનવાધિકાર માટે આંતરરાષ્ટ્રીય સ્તરે કાર્યરત સંસ્થા એમ્નેસ્ટી ઈન્ટરનેશનલ સહિત વિવિધ સ્તરે રજૂઆતો કરેલી. આમાંના એક રજૂઆતકર્તા હતા ભુજના એડવોકેટ હેનરી જેમ્સ ચાકો. હેનરી ચાકોએ આ અંગે જરૂરી પૂરાવા સાથે રાષ્ટ્રીય માનવ અધિકાર પંચને સવિસ્તર રજૂઆત કરી હતી. જેને ગંભીરતાથી લઈ આયોગે કેસનો નંબર પાડીને તપાસ હાથ ધરી છે.

કચ્છખબરે પ્રગટ કરેલાં અગાઉના અહેવાલોની લિન્ક અહીં આપી છે, તેને ટચ કરવાથી લિન્ક ખૂલી જશે.

https://www.kutchkhabar.com/vishesh/mandvi-police-accused-of-illegal-detention-to-shield-attackers-of-nepali-youth-15436

https://www.kutchkhabar.com/vishesh/victim-mercilessly-thrashed-with-sticks-allegedly-held-by-mandvi-police-from-last-week-15430

https://www.kutchkhabar.com/mandvi/police-register-complaint-against-three-villains-for-assaulting-youth-in-mandvi-15427

https://www.kutchkhabar.com/mandvi/youth-mercilessly-beaten-by-trio-in-mandvi-victim-goes-missing-15424