આપ જાણીને ચોંકી ઉઠશો કે પોલીસે જેને ફરિયાદમાં અજાણ્યો માણસ દર્શાવ્યો છે તે નેપાળી યુવક તેના પર અત્યાચાર ગુજારાયો તે રાત્રિથી માંડવી પોલીસના જ કબજામાં છે! સૂત્રોમાંથી મળેલી આ માહિતી ખૂબ ચોંકાવનારી છે.

સૌથી મોટો પ્રશ્ન એ ઊભો થાય છે કે આ યુવક માંડવી પોલીસ પાસે પહોંચ્યો કઈ રીતે? શું તેને માર મારનારાં પોલીસ પાસે લઈ ગયેલાં? કે ઘાયલ યુવક જાતે અત્યાચાર ગુજારનારાં લોકો વિરુધ્ધ ફરિયાદ નોંધાવવા ગયેલો? પીડિત યુવક તેને માર મારનારાં લોકો સામે ફરિયાદ ના નોંધાવે તે હેતુથી પોલીસે તેને પોતાના કબજામાં રાખ્યો છે?

માની લો કે પીડિત યુવકે કોઈ ગુનો આચર્યો હોય તો પોલીસે શા માટે તેની સામે કોઈ ગુનો દાખલ કર્યો નથી?

યુવક પર થતાં અત્યાચાર વખતે ત્યાં એક ખાખી વર્દીધારી ચૂપચાપ તમાશો જોતો ઊભો હતો. ખુદ પીઆઈ ચેતક બારોટે જણાવેલું કે તે હોમગાર્ડ જવાન હતો. તો આ હોમગાર્ડને શા માટે ફરજચૂક બદલ આરોપી બનાવાયો નથી અથવા એક્શન લેવાયાં નથી.

પોલીસ હજુ એક જ રટણ કરી રહી છે કે તપાસ ચાલું છે! વીડિયો રેકોર્ડ કરી વાયરલ કરનાર ચોથા યુવકને પણ પોલીસે ધરાર આરોપી બનાવ્યો નથી.

ગંભીર રીતે ઘાયલ નિર્દોષ યુવકને પોતાના કબજામાં રાખીને બેઠેલી માંડવી પોલીસનું આ કરતૂત જોતાં ગુજરાતના પોલીસ વડા સમગ્ર મામલાને ગંભીરતાથી લઈ તટસ્થ તપાસના આદેશો આપીને જવાબદાર પોલીસ કર્મચારીઓ સામે કડક એક્શન લે તે અનિવાર્ય છે. આ મામલો માનવ અધિકારોના હનન, લિન્ચીંગ, આરોપીઓને છાવરવા માટેની પોલીસની મેલી મથરાવટી સહિતના અનેક મુદ્દાને સ્પર્શે છે.