એટલું જ નહીં, માર મારતાં મારતાં લાકડી તૂટી જાય છે તો આ શખ્સ પાસે રહેલો મજબૂત ધોકો ઉપાડીને ફરી તૂટી પડે છે. માર ખાનારો યુવક અસહ્ય પીડાથી બુમો પાડતો કણસી રહેલો દેખાય છે. વીડિયોના અંતમાં અચાનક ત્રીજો યુવક આવીને જમીન પર પડેલાં યુવકને ધોકા મારવા મંડી પડે છે.

૫૭ સેકન્ડની આ વીડિયો ક્લિપ સાથે ઘટના માંડવીના આઝાદ ચોકની હોવાનું અને લુખ્ખા તત્વો કાયદો હાથમાં લઈને પોલીસનો કોઈ ભય ના રહ્યો હોય તેમ પરપ્રાંતીય યુવકને બેખૌફ મારી રહ્યાં છે તેવો સંદેશ લખેલો છે. ઘટના જોતાં મોડી રાત્રિની જણાય છે કારણ કે ટ્રાફિક અને માણસોની ચહલપહલથી ધમધમતો આઝાદ ચોક સાવ નિર્જન જણાય છે.

યુવકને ઢોર માર મરાતો હોય છે તે સમયે એક ખાખી વર્દીધારી પણ થોડીકવાર માટે વીડિયોમાં દેખાય છે. આ વર્દીધારી પણ શાંતિથી યુવકને માર ખાતો જોઈ રહેલો જણાય છે. બનાવ અંગે કચ્છખબરે માંડવીના પીઆઈ ચેતક બારોટને પૂછ્યું તો તેમણે આ ઘટના અંગે સંપૂર્ણ અજાણતા દર્શાવી છે. ઘટના આઝાદ ચોકની છે કે કેમ તે પૂછવા છતાં બારોટે કોઈ પ્રત્યુત્તર આપ્યો નહોતો.

કચ્છખબરે ઘટના અંગે માંડવીના સ્થાનિક જાણકારોનો સંપર્ક કર્યો તો જાણવા મળ્યું કે ઘટના ચોથી એપ્રિલની મધરાતની છે. માર ખાનારો યુવક નેપાળનો છે અને ઘટના બાદ તેનો કોઈ અતોપત્તો મળ્યો નથી. માર મારનારના ચહેરાં વીડિયોમાં સ્પષ્ટ દેખાય છે અને કોઈ સંગઠનના હોદ્દેદારો છે.

સમગ્ર બનાવ અંગે પોલીસ સુપેરે વાકેફ છે પરંતુ સંગઠનના હોદ્દેદારોને છાવરવા ખાતર પોલીસે નિર્લજ્જતાથી અજાણતા ધારણ કરી લીધી હોવાનો સૂત્રોએ દાવો કર્યો છે. વીડિયોમાં દેખાતો યુનિફોર્મધારી શખ્સ જીઆરડીનો જવાન હોવાનું પણ સૂત્રોએ ઉમેર્યું છે.