|
કચ્છખબરડૉટકોમ, અંજારઃ ૧૧ દિવસ અગાઉ પૂર્વ કચ્છ લોકલ ક્રાઈમ બ્રાન્ચે ટપ્પર ગામે આવેલી એક વાડીમાં કટિંગ સમયે ત્રાટકીને ૭૯.૫૨ લાખના ઈંગ્લિશ દારૂના જંગી જથ્થા સાથે ટેન્કર, હાઈવા ડમ્પર, બોલેરો, બાઈક મળી ૪ વાહન જપ્ત કરેલાં. પોલીસે જે ૧૦ વ્હિલવાળું હાઈવા ડમ્પર જપ્ત કરેલું તેનો નંબર હતો GJ-12 AT-9880. આ ડમ્પર મુંદરાના ઝરપરા ગામના સવરાજ સામત લાખાણીની માલિકીનું છે. તપાસમાં બહાર આવેલું કે અંજારના દબડાના રાજેશ આહીરે કટિંગ માટે વાહનો અને મજૂરોની વ્યવસ્થા કરેલી. રાજેશ હજુ ઝડપાયો નથી. પોલીસની ગહન તપાસ ચાલી રહી છે ત્યાં ગઈકાલે અચાનક અંજારના સિનુગ્રા ગામે રહી વાહનોનું કલરકામ કરતાં હનીફ અલીમામદ કક્કલના ઘરે પોસ્ટ મારફતે આર.સી. બૂક આવેલી. આ આર.સી. બૂક LCBએ જપ્ત કરેલા હાઈવા ડમ્પરની હતી. હનીફે પોલીસનો સંપર્ક કરીને જાણ કરી.
પોલીસે તપાસ કરી તો બહાર આવ્યું કે ફરાર રાજેશ આહીરે અંજારના આરટીઓ એજન્ટ રાહુલ રામજી આહીરની મદદથી, વાહન ટ્રાન્સફર કરવાના ટીટીઓ ફોર્મમાં હનીફની ખોટી સહી કરીને બારોબાર તેના નામે ચઢાવી દીધું હતું!
હનીફે અંજાર પોલીસ મથકે રાજેશ આહીર અને રાહુલ આહીર વિરુધ્ધ BNS કલમ ૩૩૬ (૨) અને (૩) ૩૩૮, ૩૩૯, ૩૪૦ (૨) ૬૧ (૨) (એ) તળે ફરિયાદ નોંધાવી છે.
Share it on
|
Latest
47499 views
