મિલ્ક બેન્કના હેડ સંદીપ ટીલવાણીએ એક વર્ષની સફર અંગે જણાવ્યું કે આ એક વર્ષમાં ૫૩૨ પ્રી-મેચ્યોર અને ઓછાં વજનવાળા બાળકો માટે મિલ્ક બેન્કની સેવા સંજીવની બની રહી છે. અગાઉ એવું થતું કે માતા વૉર્ડમાં દાખલ હોય અને બાળક NICUમાં હોય ત્યારે મજબૂરીમાં નવજાતને પાવડરનું  દૂધ આપવું પડતું. જેના કારણે બચ્ચાઓમાં ચેપ, અપચો વગેરે તકલીફ થવાની ફરિયાદો આવતી હતી. મિલ્ક બેન્ક શરૂ થયા પછી હવે ચિત્ર સંપૂર્ણ બદલાઈ ગયું છે.

પંપથી દાતા માતાઓનું દૂધ લેવામાં આવે છે. તેને વૈજ્ઞાનિક પધ્ધતિથી ઉકાળીને જંતુમુક્ત (પાશ્વરાઈઝેશન) કરી, માઇક્રોલેબમાં તેનું પરીક્ષણ કરીને મૂળ માતાની મંજૂરી બાદ નવજાતને દુગ્ધપાન કરાવાય છે. બેન્કમાં સ્વૈચ્છિક દુગ્ધ દાત્રી માતાનું દૂધ એકત્ર કરીને સ્ટોર કરી જરૂરતમંદ બાળકોને અપાય છે. બાળરોગ નિષ્ણાત ડો. યશ્વી દત્તાણી અને ડૉ. તરલ કેશરાણીએ જણાવ્યું કે અકાળે જન્મેલાં, અલ્પવિકસિત નવજાત બાળકો માટે પાવડરના દૂધની તુલનાએ માતાનું દૂધ દસગણું ચડિયાતું હોય છે.

મિલ્ક બેન્ક સ્ટાફના અવિરત પ્રયત્નોથી ૧૮૦૦થી વધુ દુગ્ધ દાત્રી માતાઓ નવજાત માટે દેવદૂત બનીને આગળ આવી છે. તે પૈકી ૬૫૦ જેટલી માતાઓ એવી હતી કે જેમને વધુ પડતું ધાવણ આવતું હતું. આવી માતાઓનું ‘દુગ્ધ દાન’ના  અનેક નવજાતો માટે સંજીવની બની રહ્યું છે.

માતાનું દૂધ એ સૌથી પોષક આહાર છે. પરંતુ, વ્યક્તિગત માન્યતાઓ, ગમા-અણગમા જેવી કેટલીક બાબતોના લીધે અમુક માતાઓ પોતાના બાળકને અન્ય માતાનું દૂધ પીવડાવવાની પરવાનગી આપતી  નથી. મિલ્ક બેન્કની નર્સો દરેક માતાનું કાઉન્સેલિંગ કરીને સમજાવે છે.