અંજાર ખાણ ખનિજ અને ભુસ્તરશાસ્ત્રીની કચેરીના બે માઈન્સ સુપરવાઈઝર, એક રોયલ્ટી ઈન્સ્પેક્ટર અને સિક્યોરીટી ગાર્ડ ગઈકાલે બપોરે ગળપાદર પાસે ગાંધીધામ મુંદરા હાઈવે પર ખનિજ ભરેલાં વાહનોનું સરપ્રાઈઝ ચેકિંગ કરી રહ્યા હતા. તે સમયે નંબર પ્લેટ વગરનું હાર્ડ મોરમ ભરેલું એક ડમ્પર પસાર થયેલું.

ખાણ ખનિજ વિભાગની ટીમે આ ડમ્પરનો પીછો કરવાનું શરૂ કરેલું ત્યાં અચાનક બાઈક લઈને આવેલા મયૂર બાબુભાઈ બવાએ સરકારી ટીમની ગાડી આગળ બાઈક લાવી દઈને રસ્તો રોકવા પ્રયાસ કરેલો.

સમગ્ર ઘટનાની ખાણ ખનિજની ટીમે વીડિયોગ્રાફી કરી લીધી હતી. ખાલી થયેલું મોરમ ૪૦ ટન હોઈ તેના ગેરકાયદે ખનન, પરિવહન બદલ પેનલ્ટી સહિત ૩ લાખ ૫૪૯૦ની ખનિજ ચોરી કર્યા અંગેનો કેસ નોંધી મયૂર બવા અને ડમ્પરચાલક સામે સરકારી ફરજમાં રૂકાવટ, મોટર વાહન અધિનિયમ, ગુજરાત ખનિજ અધિનિયમ સહિતની વિવિધ કલમો તળે માઈન્સ સુપરવાઈઝર ગૌરાંગ પરમારે ગાંધીધામ એ ડિવિઝન પોલીસ મથકે મોડી રાતે ફરિયાદ નોંધાવી હતી.

મયૂર અને તેના પિતા બાબુભાઈ બવા અગાઉ ૨૪-૦૮-૨૦૨૨ના રોજ આ રીતે ખનિજ ભરેલાં વાહનો ભગાડી ગયાં હતા અને તે અંગે ફરિયાદ નોંધાવાઈ હતી.

પશ્ચિમ કચ્છમાં ગેરકાયદે ખનિજ ખનન, પરિવહન સામે લોકલ ક્રાઈમ બ્રાન્ચની કાર્યવાહી જારી રહી છે. LCBએ માંડવીના દુર્ગાપુર પાસેથી બેન્ટોનાઈટ ભરેલી ૬ ડમ્પર જપ્ત કર્યાં છે. પીઆઈ એ.એમ. મકવાણાએ જણાવ્યું કે લખપતથી આવેલાં બેન્ટોનાઈટ ભરેલાં આ ડમ્પરોનો માલ  રોયલ્ટી પાસ મુજબ દુર્ગાપુરની આદ્યશક્તિ માઈન કેમ ખાતે ખાલી કરવાનો હતો. તેના બદલે આ બેન્ટોનાઈટ ત્યાંથી એક કિલોમીટર દૂર સરકારી સર્વે નંબર ૧૬૬ પૈકીના સરકારી પ્લોટમાં ગેરકાયદે ઠલવાતો હતો. આરાધ્યા માઈનકેમના માલિક પીયૂષ પ્રમોદભાઈ ભાનુશાલીના કહેવાથી ડમ્પરોને અહીં ગેરકાયદે રીતે ખાલી કરવા લવાયાં હોવાનું સ્થળ પર હાજર કર્મચારી અંકિત કષ્ટાએ પોલીસને જણાવ્યું હતું. પોલીસે તમામ ૬ ડમ્પરો માંડવી પોલીસ મથકે લઈ જઈ, સીઝ કરાવી આગળની કાર્યવાહી ખાણ ખનિજ કચેરીને સુપ્રત કરી દીધી છે.