ભચાઉના બાનિયારી ગામનો ગુલામ ઉમર નોડે ૩૦મી સપ્ટેમ્બરે સવારે ૧૦થી ૧૧ના અરસામાં બાઈક લઈ ધમડકાથી બુઢારમોરા ગામ તરફ જતો હતો ત્યારે ચામુંડા સિમેન્ટના કારખાના પાસે અજાણ્યા વાહનચાલકે પાછળથી તેની બાઈકને ટક્કર મારેલી. ટક્કર માર્યાં બાદ અજાણ્યો વાહનચાલક વાહન સમેત નાસી ગયેલો.

બનાવ અંગે તેમના પુત્ર સિકંદરે ૦૨-૧૦-૨૦૨૬ના રોજ દુધઈ પોલીસ સ્ટેશનમાં અજાણ્યા વાહનચાલક સામે માનવ જીવન ભયમાં મૂકાય તે રીતે બેદરકારીપૂર્વક અને ભયજનક રીતે વાહન હંકારી ગંભીર ઈજા પહોંચાડવા બદલ ફરિયાદ નોંધાવી હતી.

પોલીસે અકસ્માતસ્થળેથી એક બોલેરો ગાડીનું તૂટેલું પતરું કબજે કરેલું. બનાવના દિવસ અને સમયે માર્ગ પરથી પસાર થયેલાં વાહનોના સીસીટીવી કેમેરાના ફૂટેજ ચેક કરતાં GJ-08 AY-5225 નંબરની બોલેરો કાર સુધી પગેરું પહોંચ્યું હતું. અકસ્માત સર્જનાર બોલેરો ચાલક જહાંગીર નોડે (ઉ.વ. ૩૮)ને ઝડપી પાડ્યો ત્યારે ચોંકાવનારો ઘટસ્ફોટ થયો હતો.

જહાંગીર અબ્દુલ નોડે પણ બાનિયારી વાંઢનો રહેવાસી છે. ૨૫ વર્ષ અગાઉ ૨૦૦૧માં રસ્તા બાબતે થયેલાં વિવાદના પગલે ગુલામ નોડે અને જહાંગીરના પરિવાર વચ્ચે ઝઘડો અને મારામારી થયેલી. તે સમયે ગુલામ નોડેએ જહાંગીરની માતાને માર માર્યો હતો. જહાંગીર તે સમયે માંડ ૧૨-૧૩ વર્ષનો હતો.

મોટો થયાં બાદ જહાંગીરે એક વખત ગુલામ નોડેના ભુંગાને આગ ચાંપી દીધી હતી. એકવાર તેની કેબિનને સળગાવી દીધી હતી. જો કે, સામાજિક આગેવાનોની મધ્યસ્થીથી બનાવ પોલીસ ચોપડે ચડ્યાં નહોતા.

જો કે, દર વખતે ગુલામ જોડે કોઈને કોઈ વ્યક્તિ બાઈક પર બેઠેલું હોય તે હુમલો કરી શકતો નહોતો. બનાવના દિવસે ગુલામ બાઈક લઈને એકલો નીકળ્યો હતો. જહાંગીરે બોલેરોથી તેનો પીછો કરેલો અને લાગ મળતાં જ ટક્કર મારીને ત્યાં ફરાર થઈ ગયેલો.

પોલીસે ગુનામાં હત્યાના પ્રયાસની કલમનો ઉમેરો કરીને જહાંગીરની ધરપકડ કરી બોલેરો જપ્ત કરી છે. ઉલ્લેખનીય છે કે આ બનાવમાં કડક તપાસ કરવા ભોગ બનનારના સમાજના આગેવાનોએ રજૂઆત કરી હતી.