આજે બપોરે રાજુ ફેરી કરીને ઘેર આવ્યો હતો અને મોટા ભાઈ પ્રેમજીને એમ કહીને નીકળ્યો હતો કે ‘હું તારી સાળી ચંપાબેનના ઘેર રામજી સાથે જાઉં છું’ થોડીકવાર બાદ ચંપા દોડતી દોડતી પ્રેમજીના ઘેર આવી હતી અને જણાવ્યું હતું કે ‘તારો ભાઈ રાજુ મારા ઘરે આવ્યો છે અને મારો દીકરો રામજી રાજુને ફાવે તેમ ગાળો બોલી ધોકાથી મારી રહ્યો છે, તેને છોડાવો’ સાળીની વાત જાણીને પ્રેમજી તુરંત તેની પત્ની અને પુત્ર સાથે મેઘપર કુંભારડીમાં શનિદેવ મંદિરથી થોડેક આગળ પેટ્રોલ પંપ સામે આવેલા ઝૂંપડાએ દોડી ગયો હતો.

રામજી સ્થળ પરથી નાસી છૂટ્યો હતો. મોટોભાઈ રાજુને તત્કાળ ખાનગી વાહનમાં સરકારી દવાખાને લઈ ગયો હતો પરંતુ તબીબોએ તેને મૃત્યુ પામેલો જાહેર કર્યો હતો. પ્રેમજીની ફરિયાદના આધારે અંજાર પોલીસે રામજી જીવાભાઈ દેવીપૂજક વિરુધ્ધ હત્યાની કલમો તળે ગુનો દાખલ કરી તેને દબોચી લઈને પીઆઈ એસ.ડી. સિસોદીયાએ ગહન પૂછપરછ તપાસ હાથ ધરી છે.