ભચાઉ પોલીસ સબ ઈન્સ્પેક્ટર જે.જે. ત્રિવેદી અને ભચાઉ ફાયર બ્રિગેડે આપેલી માહિતી મુજબ ગાંધીધામના ભારતનગરમાં રહેતા કેતનભાઈ શ્રીમાળી તેમના પત્ની નેહાબેન અને અઢી-ત્રણ વર્ષના સંતાન વીરાજને ટાટા ટિયાગો કારમાં લઈ મોરબી તરફ જતા હતા.

મધરાત્રે સાડા બારના અરસામાં કેસરીગઢ રીસોર્ટ સામે પાછળથી પ્લાય ભરીને આવેલી ટ્રકે કારને અડફેટે લીધી હતી. અકસ્માતમાં દંપતિ અને બાળકને ઈજાઓ થયેલી. થોડીકવાર બાદ સીએનજી કારમાં આગ ફાટી નીકળી હતી. દુર્ઘટના અંગે જાણ થતાં સ્થળ પર દોડી આવેલી ભચાઉ ફાયર બ્રિગેડની ટીમે સળગતી કારમાં ફસાયેલાં ગંભીર રીતે ઘાયલ કેતનભાઈ અને નેહાબેનને જીવના જોખમે બહાર કાઢી દીધાં હતા.

કેતનભાઈ અને નેહાબેનની હાલત ગંભીર છે અને તેમને ભુજ જી.કે. જનરલ હોસ્પિટલમાં સારવાર માટે ખસેડાયાં છે.

ટિયાગો કાર અને પ્લાય ભરેલી ટ્રકનો અકસ્માત જોઈને પાછળ આવતી એક ટ્રકના ચાલકે બ્રેક મારીને તેની ટ્રક થોભાવી દીધી હતી. આગળ જતી ટ્રક અચાનક ઊભી રહેતાં પાછળ લોખંડના પાઈપ લઈને આવી રહેલા ટ્રેલરના ચાલકે તેનું વાહન ટ્રક પાછળ ઘૂસાડી દીધું હતું. જેમાં લોખંડના પાઈપો કેબિન પર પડતાં કેબિનમાં રહેલા ડ્રાઈવર અજય વિન્દેશ્વર રાય (ઉ.વ. ૪૭, રહે. મુંદરા)નું મૃત્યુ નીપજ્યું હતું.