ગત ૪થી સપ્ટેમ્બર ૨૦૨૫ના રોજ હરિયાણાના ભીવાની શહેરના કૉર્ટ સંકુલમાં લવજીત નામના શખ્સની ગોળી મારી કરાયેલી હત્યાના ગુનામાં બેઉ જણ નાસતાં ફરતાં હતા. ATSએ જણાવ્યું કે કાલી ગેંગ લીડર નવીન બોક્સર સાથે ઘનિષ્ઠ રીતે સંકળાયેલો છે. નવીન બોક્સર તેને સૂચના આપે તે મુજબ કાલી અને અન્ય ગેંગસ્ટર્સ ગુના આચરે છે. લવજીતની હત્યા બાદ કાલી રાપરમાં આવીને રહેવા માંડેલો. ત્યારબાદ, ગોદારા અને નવીનની સૂચના મુજબ ગોલુએ પણ રાપર આવી કાલીના રહેણાકમાં આશ્રય મેળવેલો. બેઉને હરિયાણા STFના હવાલે કરી દેવાયાં છે.

રોહિત ગોદારા લૉરેન્સ બિશ્નોઈ ગેંગના સૂત્રધાર ગોલ્ડી બ્રારનો ખાસ સાગરીત છે. આ ગેંગ ઉત્તર ભારતના વિવિધ રાજ્યોમાં શરાબના ઠેકેદારો, જાણીતી હસ્તીઓ, વેપારીઓ, ઉદ્યોગપતિઓ, મોટી મોટી હોસ્પિટલો પાસેથી ખંડણી ઉઘરાવવાનું, કોન્ટ્રાક્ટ કિલીંગ જેવા ગંભીર ગુના આચરે છે.

પંજાબ હરિયાણામાં પોતાનું વર્ચસ્વ અને ધાક જમાવવા બંને ગેંગ વચ્ચે હિંસક ગેંગવૉર ચાલી રહી છે. ઈન્ટર ગેંગવૉરના પરિણામે જ લવજીતની હત્યા થઈ હોવાનું મનાય છે. રાજસ્થાનમાં કરણી સેનાના પ્રમુખ સુખદેવસિંહ ગોગામેડીની હત્યાની જવાબદારી ગોદારા ગેંગે લીધી હતી. આ ગેંગના મોટાભાગના સૂત્રધારો વિદેશ ભાગી ગયાં છે અને સ્થાનિકે ભરતી કરેલાં માણસો મારફતે ગંભીર ગુનાઓને અંજામ આપે છે.

લવજીતની હત્યાના પગલે એક્શનમાં આવેલી હરિયાણાની સ્પેશિયલ ટાસ્ક ફોર્સે ગત બીજી ડિસેમ્બરે સોનીપતમાંથી ગોલ્ડી-ગોદારા ગેંગના સાત સાગરીતોની સાત વિદેશી પિસ્તોલ અને ૧૯૭ કારતૂસ સાથે ધરપકડ કરી હતી. આ ગેંગને મળતાં ફંડીંગ, આશ્રયસ્થાનો, તેમની મૂવમેન્ટ પર હરિયાણા STFએ બરાબરનો ગાળિયો કસતાં બંને ગેંગસ્ટર્સ રાપરમાં આવીને રહેવા માંડેલાં.