અંજારના પોલીસ સૂત્રોમાંથી પ્રાપ્ત માહિતી મુજબ ચંદિયા ગામે રહેતી ૧૮ વર્ષની રાધા સથવારા (દેવીપૂજક)ને નજીકના મિંદીયાળા ગામે રહેતા રાજેશ રબારી નામના યુવક સાથે આંખો મળી ગઈ હતી.

ગર્ભવતી રાધાએ રાજેશ પર લગ્ન કરવા દબાણ વધારતાં રાજેશે રાધાને પત્ની બનાવવાના બદલે પતાવી દેવાનું નક્કી કરેલું.

બે-ત્રણ દિવસ અગાઉ ઘરેથી ભાગી જઈને લગ્ન કરવાના બહાને રાજેશ રાધાને ગામના સીમાડે લઈ આવ્યો હતો. રાજેશે તેના મિત્ર રાહુલ રબારી (રહે. મખિયાણા)ની મદદથી સૌપ્રથમ રાધાને ગળેટૂંપો આપી મારી નાખી હતી. બાદમાં વજનદાર પથ્થર બાંધીને રાધાની લાશને સીમાડે આવેલા પાણી ભરેલાં કૂવામાં નાખી દીધી હતી.

ઘટના અંગે રાજેશ અને રાહુલ વિરુધ્ધ હત્યા સહિતની કલમો તળે વિધિવત્ ફરિયાદ દાખલ કરવાની તજવીજ હાથ ધરાઈ છે.