ટેન્કરને પોલીસ સ્ટેશન લઈ આવીને પોલીસે તમામ ખાનાં ખોલી તપાસ કરતા તેમાંથી વિવિધ બ્રાન્ડના શરાબ અને વોડકાની ૧૮૦ ML (ક્વાર્ટરિયા)ની ૨૧ હજાર ૮૮૮ નંગ બાટલીઓ અને ૩૭૫ MLની ૮૪૦ નંગ બાટલીઓ મળી આવી હતી. રાજસ્થાનના વિવિધ શહેરની ડિસ્ટલરીઝમાં આ શરાબ બન્યો હોવાનું બાટલીઓ પર લાગેલા લેબલ પરથી સ્પષ્ટ થયું છે.

ટ્રકના ડ્રાઈવર મોટારામ પુનમારામ જાટ (રહે. બાડમેર)એ પ્રાથમિક પૂછપરછમાં જણાવ્યું કે પવનસિંહ મહેચ્છા નામનો શખ્સ તેને દારૂ ભરેલું ટેન્કર આપી ગયેલો અને ચંદન ગોપાલ ગુપ્તા (ઉ.વ.૪૮, રહે. ઓધવદર્શન સોસાયટી, મેઘપર બોરીચી)  તથા રાહુલ ઘનશ્યામસિંહ જાડેજા (રહે. પારસગનગર,  મેઘપર બોરીચી)ને માલ સપ્લાય કરવા જણાવ્યું હતું. રાત્રે પોલીસે ચંદન અને રાહુલની પણ ધરપકડ કરી લીધી હતી.

સામાન્યતઃ લોકલ પોલીસ દ્વારા ભાગ્યે જ જંગી દારૂનો જથ્થો જપ્ત કરાય છે. મોટાભાગે લોકલ ક્રાઈમ બ્રાન્ચ કે સાયબર સેલ જેવી જિલ્લાસ્તરની અથવા SMC જેવી રાજ્યસ્તરની એજન્સીઓ આવો ક્વૉલિટી કેસ કરતી હોય છે. ત્યારે, બી ડિવિઝનના પીઆઈ એસ.વી. ગોજીયા, પીએસઆઈ એલ.એન. વાઢીયા અને સર્વેલન્સ સ્ક્વૉડની આ સફળ રેઈડના લીધે બૂટલેગરોમાં ફફડાટ ફેલાયો છે.