પોલીસ ફરિયાદમાં જણાવાયું હતું કે કિશોરી મંદિરે દર્શન કરવા એકલી જતી હતી ત્યારે શાહિદે મોટર સાયકલથી આવીને તેને ડરાવી ધમકાવીને તેનો મોબાઈલ નંબર મેળવી લઈ સોશિયલ મીડિયા મારફતે તેની સાથે ફ્રેન્ડશીપ રાખવા દબાણ કરેલું.

આ ગુનામાં ફરિયાદ પક્ષે રજૂ થયેલાં ૩૦ દસ્તાવેજી આધાર પુરાવા અને ૧૧ સાક્ષીઓને તપાસીને વિશેષ પોક્સો કૉર્ટના ખાસ જજ જે.એ. ઠક્કરને શાહિદને પોક્સો એક્ટની કલમ ૬ હેઠળ અંતિમ શ્વાસ સુધીની કેદ સાથે ૫૦ હજાર રૂપિયા દંડ, BNS કલમ ૧૩૭ (૨) હેઠળ ૫ વર્ષની સખ્ત કેદ અને પાંચ હજાર રૂપિયા દંડ તથા કલમ ૩૫૧ (૩) તળે ૧ વર્ષની સખ્ત કેદ સાથે ૫ હજાર રૂપિયાનો દંડ ફટકાર્યો છે.

આ કેસમાં ફરિયાદમાં સરકારી પક્ષે મુખ્ય જિલ્લા સરકારી વકીલ એચ.બી. જાડેજાએ હાજર રહીને પેરવી કરેલી. ભોગ બનનારના કાનૂની સહાયક તરીકે એડવોકેટ માલશ્રી ગઢવીએ સેવાઓ આપી હતી. ફરિયાદીના વકીલ તરીકે કાન્તા વેકરીયા હાજર રહ્યા હતા.

આ ગુનાના એક માસ બાદ શાહિદ બાફણ સહિતના કુલ પાંચ આરોપીઓ સામે ૧૪ વર્ષની વધુ એક કિશોરીએ દુષ્કર્મ સહિતની કલમો તળે માનકૂવા પોલીસ મથકે ફરિયાદ નોંધાઈ હતી. પાંચ પૈકીના ત્રણ આરોપીએ બ્લેકમેઈલ કરીને બાળા જોડે વારંવાર દુષ્કર્મ આચર્યું હોવાનું ફરિયાદમાં લખાવાયું હતું. આ કેસની ટ્રાયલ હાલ કૉર્ટમાં પેન્ડિંગ છે. એક માસના ગાળામાં બે ફરિયાદોના પગલે ભારે ચકચાર મચી ગઈ હતી.