૨૩ વર્ષિય ફરિયાદી પ્રથમ બુધાભાઈ મહેશ્વરી (રહે. રામ મંદિર પાસે, જૂના વાસ, માધાપર)એ તેના મિત્ર કિશન માતંગ (રહે. મતિયા કોલોની, માધાપર જૂના વાસ) સામે ફરિયાદ નોંધાવી છે. બેઉ જણ મજૂરી કરે છે. ફરિયાદીએ જણાવ્યું કે બેઉ મિત્રો છે અને સાથે હરે-ફરે છે.

કિશનને મોબાઈલનો પાસવર્ડ અને મિત્રના બેન્ક ખાતા અંગે બધી ખબર હતી. ૨૬ માર્ચથી ૩૧ માર્ચ ૨૦૨૫ દરમિયાન ફરિયાદી અને તેની માતાના જોઈન્ટ બેન્ક ખાતામાંથી ટુકડે ટુકડે ૧ લાખ ૭૯ હજાર ૯૯૮ રૂપિયા અન્ય અજાણ્યા ખાતામાં ટ્રાન્સફર થઈ ગયેલાં. રૂપિયા કોણે કેવી રીતે કોના ખાતામાં ટ્રાન્સફર કરાવી લીધા તે અંગે અજાણ ફરિયાદીએ ઓનલાઈન સાયબર ક્રાઈમ પોર્ટલ પર ફરિયાદ નોંધાવી માધાપર પોલીસ મથકે અરજી આપેલી.

આ અંગે કિશનને વાત કરતાં તેણે ગુનો કબૂલીને ટુકડે ટુકડે રૂપિયા પરત આપી દેવાનો વાયદો કરીને પોલીસ સ્ટેશનમાં કરેલી અરજી પાછી ખેંચી લેવા જણાવેલું. કિશને વાયદા મુજબ  રૂપિયા પરત ના આપતાં પ્રથમે ફરિયાદ નોંધાવી છે.