ગત ૨૬-૧૦-૨૦૨૫ના રોજ કાન્તિભાઈને મોબાઈલ ફોનમાં એક ટેક્સ્ટ મેસેજ મળ્યો હતો કે તેમના ખાતામાં એક લાખ રૂપિયા જમા થયાં છે. એક લાખ રૂપિયાની લૉટરી અચાનક કેવી રીતે લાગી ગઈ તે અંગે કાન્તિભાઈ સુખદ આશ્ચર્યમાં મૂકાઈ ગયાં હતા.

નાણાં જમા થયાનો મેસેજ મળ્યાં બાદ તેમને બે જુદાં જુદાં નંબર પરથી ફોન આવેલાં. ફોન કરનાર મહેન્દ્ર રામપ્રકાશ શર્મા નામનો ઉત્તરપ્રદેશનો અજાણ્યો શખ્સ હતો. શર્માએ કાન્તિભાઈને જણાવ્યું કે ભૂલથી તમારા ખાતામાં મારાં એક લાખ રૂપિયા જમા થઈ ગયાં છે, તે મને તાત્કાલિક પાછાં આપો. મારી પત્નીને એક્સિડેન્ટ થયો છે, ખૂબ સિરિયસ છે અને હોસ્પિટલમાં દાખલ છે. મને તાત્કાલિક મારાં રૂપિયા આ નંબરના જી-પે પરત મોકલી આપો.

બીજા દિવસે મહેન્દ્રએ ફોન કરીને કાન્તિભાઈને જણાવેલું કે તમે કાલે જે રૂપિયા જમા કરાવેલાં તે મને મળ્યાં નથી, એ રૂપિયા હજુ તમારા જી-પેમાં જ પડ્યાં છે. મને તાત્કાલિક રૂપિયા મોકલો. તેની વાતો પર ભરોસો કરીને કાન્તિભાઈએ ફરી એક લાખ રૂપિયા મોકલી આપ્યાં હતા.

૩૧ તારીખ સુધી દરરોજ આ સિલસિલો ચાલું રહેલો. કાન્તિભાઈએ ટુકડે ટુકડે ૫ લાખ ૪૧ હજાર ૫૩૫ રૂપિયા મોકલી આપ્યાં હતા. મહેન્દ્ર શર્મા વખતોવખત કહેતો કે તમારા રૂપિયા ક્યાંય નહીં જાય. કદાચ તમારા વધારાના રૂપિયા મારા ખાતામાં આવી જશે તો હું પાછાં મોકલી આપીશ.

૫.૪૧ લાખ રૂપિયા ટ્રાન્સફર કર્યાં બાદ કાન્તિભાઈએ તપાસ કરતાં તેમના પગ નીચેથી ધરતી સરકી ગઈ હતી. તેમના બેન્ક ખાતામાં એક લાખ રૂપિયા જમા થયાં જ નહોતાં! ભ્રામક મેસેજથી ભરમાઈ ગયેલાં. તેમણે નેશનલ સાયબર ક્રાઈમ પોર્ટલ પર ફરિયાદ નોંધાવતાં ગયેલાં રૂપિયામાંથી સામેવાળાના ખાતામાં રહેલા ૩૩,૭૯૬ રૂપિયા હોલ્ડ થઈ ગયાં છે. બાકીના બધા રૂપિયા સાયબર માફિયાઓની પથરાયેલી જાળમાં ગાયબ થઈ ગયાં છે. બનાવ અંગે દુધઈ પીઆઈ આર.આર. વસાવાએ અજાણ્યા સાયબર ચીટરો વિરુધ્ધ ગુનો નોંધી તપાસ હાથ ધરી છે.