બાતમીના આધારે આજે પરોઢે પાંચ વાગ્યે LCBએ નખત્રાણા તાલુકાના મંગવાણાથી ગઢશીશા તરફ જતા રોડ પર વડવા કાંયા ગામની સીમમાં બાવળોની ઝાડીઓમાં દરોડો પાડ્યો હતો.

પોલીસે  સ્થળ પર પડેલી એક મોટર સાયકલ જપ્ત કરીને GJ-18 AX-6186 નંબરની ટ્રક પાસે જઈને કેબિનમાં જોયું તો અંદર ડ્રાઈવર સૂતો હતો! પોલીસે તેને ઉઠાડીને પૂછતાં તેણે ટ્રકમાં દારૂ ભરેલો હોવાનું જણાવ્યું હતું. ડ્રાઈવર સત્તારખાન રમજાનખાન પઠાણ (ઉ.વ. ૨૯, બાડમેર, રાજસ્થાન)એ પોલીસ સમક્ષ કબૂલ્યું કે ટ્રકના માલિક શકુરખાન નવાબખાને તેના મિત્ર અકબરખાન સમેજા (બંને રહે. બાડમેર) સાથે ફોન પર વાત કરેલી અને બેઉ જણે પંજાબથી ટ્રકમાં શરાબનો જથ્થો લોડ કર્યો હતો.

વરસાદી ઝાપટાંના કારણે ગામડાનો કાચો રસ્તો કાદવ કીચડવાળો થઈ ગયો હતો. રસ્તામાં એક જગ્યાએ ટ્રકનું પૈડું ફસાઈ જતાં JCBની મદદથી ટ્રકને બહાર કઢાઈ નખત્રાણા પોલીસ મથકે લઈ અવાઈ હતી.

પોલીસે ગણતરી કરતાં ૩૮.૫૨ લાખની શરાબની નાની મોટી ૭૭૪૦ નંગ બાટલીઓ અને ૯.૬૦ લાખની કિંમતના ૭૬૮૦ નંગ બિયર ટીન મળી આવ્યાં હતા.

પોલીસે ૪૮.૧૨ લાખના શરાબ સાથે ૧૦ લાખની ટ્રક, ૨૦ હજારની બાઈક, એક મોબાઈલ ફોન વગેરે મળી કુલ ૫૮.૩૭ લાખનો મુદ્દામાલ કબજે કરીને દારૂ મોકલનાર બાડમેરના બેઉ શખ્સો અને ટ્રકના ડ્રાઈવર, મગાવનાર જીતીયો સોઢા, ક્રેટા, સ્વિફ્ટ કાર અને બાઈકના ચાલકો-માલિકો વિરુધ્ધ નખત્રાણા પોલીસ મથકે પ્રોહિબિશનની વિવિધ ધારાઓ તળે ગુનો દાખલ કર્યો છે.

ગુજરાતમાં પ્રવેશ્યાં બાદ બૂટલેગરોએ પોલીસની આંખમાં ધૂળ નાખવા ટ્રકને સીધા રસ્તે લાવવાના બદલે વાયા અમદાવાદનો રૂટ પસંદ કર્યો હતો. ભટીંડાથી ગુજરાતના થરાદ, ડીસા, પાલનપુર, મહેસાણા થઈને ટ્રકને અમદાવાદ લઈ જવાયેલી. ત્યાંથી હળવદ, માળિયા, સામખિયાળી, અંજાર, ભુજના રૂટ પર ટ્રક નખત્રાણા આવેલી. LCB પોલીસ ઈન્સ્પેક્ટર એ.એમ. મકવાણા અને તેમની ટીમે ગુનો નોંધાવી તપાસ હાથ ધરી છે.