GETCOના ટૂંકા નામે પ્રચલિત ગુજરાત એનર્જી ટ્રાન્સમિશન કોર્પોરેશન લિમિટેડના અંજારસ્થિત કંટ્રોલ રૂમ દ્વારા સમગ્ર કચ્છના ભુજ અને અંજાર સર્કલના ગામડાઓમાં કાર્યરત જ્યોતિગ્રામ યોજના (JGY) ફીડર બંધ કરવા સૂચના અપાઈ હતી. જેના પગલે પોણા આઠ બાદ ટપોટપ તમામ JGY ફીડરનો વીજ પુરવઠો બંધ કરી દેવાતાં ગ્રામ્ય વિસ્તારોમાં અચાનક અંધારપટ છવાઈ ગયો હતો. પશ્ચિમ કચ્છ PGVCL દ્વારા JGYના તમામ ૨૦૦ ફીડર અને અંજાર PGVCL દ્વારા ૭૦ ફીડરનો વીજ પુરવઠો બંધ કરી દેવાયો હતો.

GETCOના આદેશના પગલે ગ્રામ્ય વિસ્તારોના સબ ડિવિઝનના ડેપ્યુટી એન્જિનિયર્સ પર વીજ ગ્રાહકોના ફોનનો મારો શરૂ થઈ ગયો હતો. માધાપરમાં એક વીજ ગ્રાહક નાયબ ઈજનેર સાથે ફોન પર જ બોલાચાલી પર ઉતરી આવ્યો હતો.

પશ્ચિમ કચ્છ PGVCLના અધીક્ષક ઇજનેર જે.સી. ગોસ્વામીએ અચાનક બ્લેક આઉટ અંગે અજાણતા દર્શાવી હતી. GETCOના અંજારસ્થિત અધીક્ષક ઇજનેર પટેલે ગ્રીડમાં કોઈ ડિસ્ટર્બન્સ ના આવે તે હેતુથી કંટ્રોલ રૂમ દ્વારા પાવર કટની સૂચના અપાઈ હોવાનું જણાવી વધુ કોઈ વિગતો તેમની પાસે ના હોવાનું જણાવ્યું હતું. 

કચ્છ એક સરહદી જિલ્લો છે. ઓપરેશન સિંદૂર વખતે કચ્છમાં અવારનવાર બ્લેક આઉટ કરાતો હતો. આજે બ્લેક આઉટની પરિસ્થિતિ સમયે કચ્છખબરે કચ્છ કલેક્ટરનો સંપર્ક કરવા વારંવાર પ્રયાસ કર્યો હતો પરંતુ કલેક્ટરના ફોનની રીંગ રણકતી રહી હતી. શક્ય છે કે કચેરીનો સમય પૂરો થઈ ગયાં બાદ પણ કોઈ મહત્વની વહીવટી કામગીરીમાં વ્યસ્ત હશે. એવું તો કેવું ગંભીર સંકટ સર્જાયું કે અચાનક બ્લેકઆઉટ કરવામાં આવ્યું તે અંગે જવાબદારો દ્વારા ખુલાસો કરાય તે અપેક્ષિત છે.