પરસોત્તમભાઈએ જણાવ્યું કે તે અવારનવાર આદિપુરમાં પંચમુખી હનુમાનજી મંદિરના દર્શને જતા હતા. ઑગસ્ટ ૨૦૨૩માં અહીં રહેતા કિરીટ પટેલ નામના અમદાવાદી શખ્સ સાથે તેમની ઓળખાણ થયેલી.

પાંચેય જણે અંજારના જુદાં જુદાં સર્વે નંબર નક્કી કરી કિરીટ પટેલને આ જમીનો તેમના નામે કરાવી આપવા જણાવેલું. કિરીટે આ કામ પેટે એડવાન્સમાં ૯૦ લાખ રૂપિયા આપવા પડશે તેમ કહેતાં ફરિયાદી સહિતના પાંચેય જણે પોત-પોતાની રીતે નાણાંનો જોગ કરીને ૯૦ લાખ રૂપિયાની સગવડ કરી દીધી હતી.

કિરીટના કહ્યા મુજબ જાન્યુઆરી ૨૦૨૫માં પૂરેપૂરાં ૯૦ લાખ રૂપિયા આપી દીધા બાદ ‘જમીનો ક્યારે પોતાના નામે થશે?’ તેની પૂછપરછ વધારી દીધી હતી.

એકવાર કિરીટે બધાને અમદાવાદ બોલાવેલા અને ‘કામ ચાલું છે, હજુ વધુ દસ લાખ રૂપિયાનો ખર્ચો થશે’ તેમ કહેલું. જો કે, પરસોત્તમભાઈને શંકા જતા દસ લાખ રૂપિયા આપવાના બદલે અગાઉ આપેલા ૯૦ લાખ રૂપિયા પાછાં આપી દેવા જણાવેલું. કિરીટે તેમને બે ત્રણ દિવસમાં રૂપિયા પાછાં આપી દેવાનો વાયદો કરેલો અને સહુ અંજાર પરત આવી ગયેલાં.

થોડાંક દિવસ બાદ પરસોત્તમભાઈના પરિચિત નારાણ રાજાભાઈ સોરઠીયાના ડ્રાઈવર સંજય પ્રજાપતિએ પરસોત્તમભાઈને ફોન કરીને જણાવેલું કે ‘તે કિરીટ પટેલને ઓળખે છે. તેની ખરેખર ગાંધીનગરમાં મોટી ઓળખાણ છે, તમારું કામ કરાવી કરાવી આપશે. તમે રૂપિયા પાછાં ના માગો’ સંજયની વાત પર ભરોસો કરીને ફરિયાદી સહિતના લોકોએ થોડી ઢીલ મૂકી હતી. પરંતુ ના તો તેમને રૂપિયા પાછાં મળ્યાં, ના જમીન તેમના નામે થઈ.

થોડાંક સમય બાદ કિરીટ પટેલનો ફોન પણ બંધ થઈ ગયો હતો. બધા ફરી અમદાવાદ ખાતે કિરીટ જ્યાં રહેતો હતો ત્યાં ગયા ત્યારે તે મકાન ખાલીને બીજે ક્યાંક રહેવા ચાલ્યો ગયો હોવાનું જાણવા મળ્યું હતું. આમ, કિરીટ પોતાને ચૂનો ચોપડી ગયો હોવાનું પામી જતાં પરસોત્તમભાઈએ આજે કિરીટ અને સંજય વિરુધ્ધ ફરિયાદ નોંધાવી છે.

ઉલ્લેખનીય છે કે, આ જ મોડસ ઓપરેન્ડીથી અમદાવાદના મુકેશ મોતીભાઈ દેસાઈ અને નિલેશ પ્રજાપતિ નામના બે શખ્સોએ ૨.૫૯ લાખની ઠગાઈ કરી હોવાની ગત ૧૦-૦૪-૨૦૨૫ના અંજાર પોલીસ મથકમાં ફરિયાદ નોંધાઈ હતી. પોલીસે ઝીણવટભરી તપાસ હાથ ધરી છે.