અંજારના ચાંદ્રાણી (કોટડા) ગામે રહેતા ૬૨ વર્ષિય દેવજીભાઈ નારણભાઈ બાલાસરા (બ્રાહ્મણ) દુધઈમાં ગરમ મસાલાની કંપનીમાં નોકરી કરે છે. દેવજીભાઈનું કામ ગામડાંઓમાં ફરીને કંપની માટે મસાલાઓની ખરીદી કરવાનું છે. ૨૩ જૂલાઈના રોજ ફરિયાદી અંજારના લાખાપર ગામના ખેડૂત મંગાભાઈ રબારીનું જીરું જોવા ગયેલો. મંગાભાઈએ તેના પરિચિત કપિલ બાબુભાઈ વાઘેલાને પણ જીરું વેચવાનું હોવાનું જણાવતાં ફરિયાદી કપિલના ઘેર જઈ જીરાનું સેમ્પલ લઈને કંપનીની બોલેરો ગાડીમાં પરત રવાના થયેલો.

બીજા દિવસે સવારે કપિલ વાઘેલાએ દેવજીને ફોન કરીને ગાડીમાં તમે અને તમારો ડ્રાઈવર મારી જાતિ વિશે જે અપશબ્દો બોલતાં હતા તેનું રેકોર્ડીંગ કરી લીધું છે તેમ જણાવી એટ્રોસિટી તળે ફરિયાદ નોંધાવવાની ચીમકી આપી ફોન કટ કરી દીધેલો. થોડીકવાર બાદ કપિલે ફરી ફોન કરીને કેસ કરીશ તો આપણાં બેઉનું ખરાબ લાગશે તેમ કહીને સમાધાન માટે ફરિયાદીને પોતાના ઘરે બોલાવેલો.

ફરિયાદી ત્યારે ગાડી લઈને પરત કંપનીમાં જતો રહેલો. સાંજે કપિલે ફોન કરીને ગામ વચ્ચે માફી માગવા જણાવતાં ફરિયાદી ફરી લાખાપર ગામે કપિલના ઘેર પહોંચેલો.

કપિલના ઘેર કપિલ સાથે અન્ય વીસેક જણનું ટોળું એકઠું થયેલું હતું. ટોળામાં કેટલીક સ્ત્રીઓ પણ હતી. રોષે ભરાયેલા ટોળાએ દેવજીભાઈને ઘેરી લઈ ગાળો ભાંડીને મુઢ માર મારી કપડાં ફાડી નાખેલાં. ત્યારબાદ દેવજીભાઈના ગળામાં બૂટ ચપ્પલનો હાર પહેરાવીને કપિલના ઘરથી ગામના એક મંદિર સુધી સરઘસ કાઢ્યું હતું. ઘટનાના પગલે દેવજીભાઈનો ડ્રાઈવર જગો રબારી ડરનો માર્યો ગાડી લઈને ગામમાંથી નાસી ગયેલો.

જૂતાંનો હાર પહેરેલા દેવજીભાઈના સરઘસની ઘટનાનો કોઈકે વીડિયો બનાવીને સોશિયલ મીડિયામાં વાયરલ કરતાં પોલીસ એક્શનમાં આવી હતી. પોલીસે બનાવ અંગે ફરિયાદ નોંધાવવા જણાવેલું. ડરના લીધે ફરિયાદ નોંધાવવામાં અચકાતાં દેવજીભાઈને અન્ય આગેવાનોએ હિંમત આપતા તેમણે કપિલ વાઘેલા અને અન્ય વીસ અજાણ્યા લોકોના ટોળાં સામે કાવતરું ઘડીને ગેરકાયદે મંડળી બનાવીને ગેરકાયદે રીતે અટકમાં રાખી, ગાળો ભાંડી માર મારીને ધમકી આપવા સબબ ફરિયાદ નોંધાવી છે.