૭૦ વર્ષિય ફરિયાદી દેવાભાઈએ જણાવ્યું કે ગત ૨૭ ડિસેમ્બરના રોજ સવારે તે કરોલપીરની દરગાહના દર્શને જતા હતા ત્યારે સામત અને જગાએ રસ્તામાં અટકાવીને કૉર્ટમાં ચાલતા કેસમાં સમાધાન કરી લેવા ધમકી આપેલી. સામતે ધમકીભર્યાં સૂરે કહેલું કે ‘સાત વરસ થઈ ગયાં, તે અમારું શું બગાડી લીધું? હવે સમાધાન કરી લેજે’ જગા રબારીએ ફરિયાદીને ધમકી આપતા કહેલું કે ‘સમાધાન ના કરે તો ગામમાં રહેવું ભારે પડી જશે, ગામ મૂકાવી દઈશ. હવે પછીની તારીખમાં સમાધાન કરી લેજે નહિતર પતાવી દઈશું’ આરોપીઓ માથાભારે હોઈ વૃધ્ધ તેની સામે ફરિયાદ નોંધાવતાં ડરતા હતા. 

જગા પચાણ રબારી નામના આ શખ્સ વિરુધ્ધ છેલ્લાં દસેક વર્ષ દરમિયાન ખંડણી ઉઘરાવવી, હિંસક હુમલા કરવા, સરકારી જમીન પચાવી દબાણ કરવા સબબ લેન્ડગ્રેબિંગ, ધાક-ધમકી આપવા સહિતના વીસેક જેટલાં ગુના નોંધાયેલાં છે. ગાંધીધામના લાકડાંના વ્હેરના વેપારીને માલ ભરવા ના દઈ જગાએ ‘ધંધો કરવો હોય તો મહિને પચાસ હજારનો હપ્તો આપવો પડશે નહિતર હાથ પગ ભાંગી નાખીશ. હું પાસામાં જઈ આવેલો છું અને મને કોઈની બીક નથી’ કહીને ખંડણી માગી હોવાની ૧૭-૦૫-૨૦૧૮ના રોજ અંજાર પોલીસ મથકે ફરિયાદ નોંધાઈ હતી. તો, વરસામેડીની તલાવડી અને સરકારી ખરાબાની જમીન પર ૧૩ વર્ષથી ગેરકાયદે બે હોટેલો, ચાર દુકાનો, સર્વિસ સ્ટેશન, પાર્કિંગ બનાવીને દબાણ કરવા સબબ ૧૭-૦૭-૨૦૨૧ના રોજ જગા સામે લેન્ડગ્રેબિંગની બે જુદી જુદી ફોજદારી ફરિયાદો દાખલ થઈ હતી.

૬-૧૨-૨૦૨૨ના રોજ જગા રબારી સહિતના પાંચ જણ સામે ૫૫ વર્ષિય સિક્યોરીટી ગાર્ડ સુરાભાઈ રબારીએ પોતાના પર હુમલો કરી ધમકી આપવાની અંજારમાં ફરિયાદ નોંધાવેલી. આ મામલે ૧૨-૧૨-૨૦૨૨ના રોજ અંજારના મહિલા પીએસઆઈ છાયાબેન રાઠોડે જગાને પકડવા ગયા ત્યારે તેણે ગેરવર્તાવ કરીને પોલીસ જીપમાં બેસવાનો ઈન્કાર કરી પોતાની ગાડીમાં પોલીસ સ્ટેશન આવ્યો હતો.

આ મામલે ફરજમાં રુકાવટ, ગાળાગાળી, મારી નાખવાની ધમકી આપવા સહિતની કલમો તળે લેડી પીએસઆઈએ તેની સામે ફરિયાદ નોંધાવેલી.

પૂર્વ કચ્છ પોલીસ વારંવાર ગંભીર ગુનાઓ આચરતાં જિલ્લાના હિસ્ટ્રીશીટર અને રીઢા આરોપીઓના અવારનવાર સંમેલનો યોજીને ઈન્ટરોગેશન અને ડૉઝિયર ભરવાના દેખાડા કરે છે. પરંતુ, જગા જેવા માથાભારે શખ્સોની દાદાગીરીમાં તસુભાર ફેર પડ્યો નથી તેનો સંકેત આજની આ ફરિયાદથી મળી જાય છે. એવું તો શું કારણ છે કે માથાભારે જગાને પોલીસ નાથી શકતી નથી?