પોલીસે અક્રમના મોબાઈલ ફોનનું લોકેશન ટ્રેસ કરીને મોડી સાંજે અંજારના વીડી નજીક ઝાડીઓ વચ્ચે ગોંધી રખાયેલી હાલતમાં બચાવી લઈને જી.કે. જનરલ હોસ્પિટલમાં સારવાર માટે મોકલી આપ્યો રૂપિયા ગૂમાવનારાં લોકોએ તેને ખરાબ રીતે કૂટી નાખ્યો હોવાનું પોલીસે જણાવ્યું છે.

સૂત્રોમાંથી પ્રાપ્ત માહિતી મુજબ ચીટીંગના આ કૌભાંડમાં જિલ્લા ઉદ્યોગ કેન્દ્રના કેટલાંક કર્મચારી અધિકારી પણ ભળેલાં છે. અક્રમ સુમરા વિરુધ્ધ ૧૦-૧૦-૨૦૨૩ના રોજ ભુજ બી ડિવિઝન પોલીસે ૬ લોકો સાથે સરકારી લોનના અપાવવાના નામે લાખ્ખોની છેતરપિંડી કરી હોવાની ત્રણ ફોજદારી ફરિયાદો દાખલ થયેલી. જે સંદર્ભે પોલીસે તે જ દિવસે તેની ધરપકડ કરેલી. જો કે, ફરિયાદ બાદ પણ અક્રમે ચીટીંગના ધંધા ચાલું રાખ્યાં હોવાની શક્યતા છે.

કચ્છખબરના સમાચારના પગલે અંજાર પોલીસ અને LCBએ તેને મુક્ત કરાવી સારવાર માટે હોસ્પિટલભેગો કર્યો છે. પોલીસે તેને માર મારનારાં ચાર લોકોને રાઉન્ડ અપ કરી તેમની સામે ફરિયાદ નોંધવા તજવીજ હાથ ધરી છે.

બીજી તરફ, પોલીસે અક્રમના ચીટીંગનો ભોગ બનેલાં લોકોને પણ ફરિયાદ માટે આગળ આવવા અનુરોધ કર્યો છે. જનતાને કાયદો હાથમાં લેવાનો અધિકાર નથી. જો કોઈએ તમારી સાથે કોઈ ગુનો આચર્યો હોય તો બહેતર છે કે તે અંગે પોલીસને જાણ કરી કાયદેસર કાર્યવાહી કરવી.