ગત રાત્રે વન વિભાગની ટીમ ભચાઉના કડોલ નજીક આવેલા કચ્છ ડેઝર્ટ વાઈલ્ડ લાઈફ સેન્ક્ચ્યુઅરી વિસ્તારમાં પેટ્રોલીંગ કરી રહી હતી. રાતના અંધારાનો લાભ લઈને કેટલાંક લોકોનું ટોળું ટ્રેક્ટરો લઈને અગર માટેના પાળા બનાવી રહ્યું હતું. વન વિભાગની ટીમે તેમને પડકારતાં ટોળું ટ્રેક્ટરો સાથે નાસવા માંડ્યું હતું. તેમને પકડવા માટે વન વિભાગની ટીમે પીછો શરૂ કર્યો હતો.

કેટલાંક લોકોએ ઉશ્કેરાઈને વન વિભાગની ટીમ પર ટ્રેક્ટર ચડાવી હુમલો કરવાનો પ્રયાસ કર્યો હતો. સતર્ક ટીમનો આ હુમલામાં આબાદ બચાવ થયો હતો.

ઘટના અંગે આજે અજાણ્યા લોકો સામે વન તંત્રએ ફર્સ્ટ ઑફેન્સ રીપોર્ટ દાખલ કર્યો છે. પૂર્વ કચ્છના નાયબ વન સંરક્ષક આયુષ વર્માએ જણાવ્યું કે આરોપીઓ સામે ભચાઉ પોલીસ મથકે ફરિયાદ નોંધાવવા સૂચના અપાઈ છે.

ઉલ્લેખનીય છે કે પૂર્વ કચ્છમાં નાનાં રણમાં વન વિભાગ હસ્તકની જમીન પર લાંબા સમયથી નમક માફિયાઓ પેશકદમી કરીને ગેરકાયદે રીતે પાળા બાંધીને મીઠું પકવી રહ્યાં છે. થોડાંક સમય અગાઉ વન વિભાગે આવા દબાણકારોને દૂર કરીને ૮૫ હેક્ટર જમીન ખુલ્લી કરાવી છે. ભૂતકાળમાં વાગડના રણમાં વન તંત્રની જમીન પચાવવા મુદ્દે નમક માફિયાઓ વચ્ચે અંદરોઅંદર હત્યા અને હુમલાના બનાવો બની ચૂકેલાં છે.