સાયબર સેલે ભુજ બી ડિવિઝન પોલીસ મથકે શુભમ્ હરિહર ડાભી, જીગર મહેન્દ્રભાઈ પરગડુ (રહે. છાડુરા, અબડાસા) અને ભાવિક નામના ત્રણ યુવકો સામે ઠગાઈ કરવાના હેતુથી ગુનાહિત કાવતરું રચીને બેન્ક ખાતું ખોલાવી, કમિશનથી તે ખાતું સાયબર માફિયાઓને ભાડે આપવા સબબની કલમો તળે ફરિયાદ નોંધાવી છે.

આ વેપારી પેઢીના નામે ભુજના આરટીઓ સર્કલ પાસે આવેલી HDFC બેન્કની બ્રાન્ચમાં કરંટ એકાઉન્ટ ખોલાવ્યું હતું. આ જ બ્રાન્ચમાં નોકરી કરતા ભુજના ભાવિક નામના યુવકે આ ખાતું ખોલ્યું હતું.

સાયબર માફિયાઓ દ્વારા દેશભરના લોકોને વિવિધ તરકીબોથી છેતરીને આ ખાતામાં રૂપિયા જમા કરાવાતાં હતા. આ નાણાં જીગર પરગડુની સહી કરેલા ચેક મારફતે ઉપાડી લેવાતાં હતા. ભુજના મુંદરા રોડ પર આવેલા સાગરસીટીમાં રહેતો શુભમ્ ડાભી IDFC ફર્સ્ટ બેન્કના ટૂ વ્હિલર લોન વિભાગમાં માસિક ૧૫ હજારના પગારે નોકરી કરે છે. ફરિયાદમાં જણાવાયું છે કે ત્રિપુટીએ ખોલાવેલાં આ બેન્ક એકાઉન્ટ પર સાયબર ફ્રોડની દેશભરમાં ૪૦ ફરિયાદો દાખલ થયેલી છે.

૦૯-૧૨-૨૦૨૪થી ૩૧-૧૨-૨૦૨૪ના ૨૨ દિવસ દરમિયાન આ બેન્ક ખાતામાં ૧૩ કરોડ ૪૯ લાખ રૂપિયાનું ટ્રાન્ઝેક્શન થયેલું. જાન્યુઆરીથી લઈ ૦૪-૦૯-૨૦૨૫ સુધીમાં વધુ ૯૧.૬૩ કરોડની લેવડદેવડ થયેલી. આમ, આ ખાતામાં કુલ ૧ અબજ ૫ કરોડ ૧૨ લાખ ૫૨ હજાર ૮૨૬ રૂપિયાના ટ્રાન્ઝેક્શન થયેલાં છે. જે પૈકીની મોટાભાગની રકમ ઉપાડી લેવાઈ છે.

ગાંધીધામની નવી સુંદરપુરીમાં રહેતા સાગર અરવિંદભાઈ પઢિયારે તેની ફોઈના દીકરા હાર્દિક રાજેશભાઈ સોલંકી (રહે. ગળપાદર) અને હાર્દિકના મિત્ર વિષ્ણુ નારણભાઈ પ્રજાપતિ (રહે. ગાંધીધામ) વિરુધ્ધ ગાંધીધામ સાયબર ક્રાઈમ પોલીસ મથકે ગુનાહિત કાવતરું રચી ઠગાઈ કરવાની ફરિયાદ નોંધાવી છે.

મે ૨૦૨૪માં હાર્દિક તેના મિત્ર વિષ્ણુને લઈ સાગરને મળવા આવેલો અને બેન્ક ખાતું વાપરવા માટે આપવા જણાવેલું.

ત્યારબાદ આ બેન્ક એકાઉન્ટમાં ટ્રાન્ઝેક્શન શરૂ થયેલાં. બેઉ જણ ફરિયાદીના મોબાઈલમાં આવતો ઓટીપી નંબર મેળવી લેતાં. આ બેન્ક ખાતું સાયબર ફ્રોડની રકમ જમા કરવામાં વપરાતું હતું. ખાતાં પર આસામ, અમદાવાદ અને મહારાષ્ટ્રમાં ત્રણ ફરિયાદો દાખલ થયેલી છે. ખાતાંમાં કુલ ૧૩.૪૭ લાખની લેવડદેવડ થયેલી છે.