રાજેશ ભીખાભાઈ રબારી (રહે. ચંદિયા)ને સીમાડે ઘેટાં બકરાં ચરાવવા જતી વખતે એક વર્ષથી ગામમાં રહેતી હતભાગી યુવતી સાથે પ્રેમ સંબંધ બંધાયો હતો. બેઉ ગામના સીમાડે અવારનવાર મળતાં હતા. હતભાગી યુવતી થોડાંક માસ અગાઉ જ્યારે કિશોર વયની હતી ત્યારે રાજેશે તેની સાથે શરીર સંબંધ બાંધ્યાં હતા. પરિણામે, તે ગર્ભવતી બની હતી.

પ્રેમિકાએ રાજેશ પર લગ્ન કરવા દબાણ વધારેલું પરંતુ રાજેશને કેવળ તેના શરીરમાં રસ હતો, લગ્ન કરવામાં નહીં. જેથી તેણે મિત્ર રાહુલ રતાભાઈ રબારી (રહે. મખિયાણા, મૂળ રહે. મિંદીયાળા) સાથે મળીને પ્રેમિકાને પતાવી દેવાનો પ્લાન બનાવ્યો હતો.

પ્રેમિકા આવ્યા બાદ તે તેને નજીકના ભલોટ ગામના રોડ તરફ પાણી ભરેલાં અવાવરુ કૂવા તરફ લઈ ગયેલો. પ્લાન મુજબ રાજેશે અચાનક ધક્કો મારી તેને જમીન પર પાડી દીધી હતી. બાદમાં ગળું દબાવી મારી નાખી હતી. પ્રેમિકા મૃત્યુ બાદ બેઉ જણે ઠંડા કલેજે ડ્રેસના દુપટ્ટાથી લાશ જોડે સિમેન્ટનો ભારેખમ બ્લોક બાંધીને કૂવામાં ફેંકી દીધી હતી.

મૃતકના પિતાએ ગઈકાલે બપોરે અંજાર પોલીસ મથકે આવીને દીકરી રાત્રિથી ગાયબ થઈ ગઈ હોવાનું જણાવી ગુમ નોંધ લખાવેલી. અંજાર પીઆઈ એ.આર. ગોહિલે જાતે રસ લઈને તપાસ હાથ ધરતાં હ્યુમન સોર્સથી જાણવા મળેલું કે યુવતીને રાજેશ જોડે પ્રેમ સંબંધ હતો. રાજેશને બોલાવીને પોલીસે યુક્તિ પ્રયુક્તિથી પૂછપરછ કરતાં તેણે ગુનો કબૂલી લીધો હતો.

પોલીસ પૂછપરછ અને તપાસમાં ગુનો બહાર આવ્યો હોઈ પોલીસે  રાજેશ અને રાહુલ વિરુધ્ધ બીએનએસની કલમ ૧૦૩ (૧), ૬૪ (૨) (એમ), ૨૩૮ (એ),  ૬૧ (૨) (એ) અને પોક્સો એક્ટની કલમ ૪ તથા ૬ હેઠળ સરકાર તરફે ગુનો દાખલ કરી બેઉની વિધિવત્ ધરપકડ કરી લીધી છે. કામગીરીમાં પીઆઈ ગોહિલ સાથે પીએસઆઈ એસ.જી. વાળા અને અન્ય સ્ટાફ જોડાયો હતો.