બાતમીના આધારે SMCએ ગાગોદર પોલીસ સ્ટેશનની હદમાં સામખિયાળી તરફ જતા હાઈવે પર આવેલી જય ગોગા રાજસ્થાન હોટેલના પાર્કિંગમાં પડેલા ઈંગ્લિશ દારૂ ભરેલાં ટ્રેલર અને તેના ડ્રાઈવર ક્લિનરને ઝડપી પાડ્યાં હતા. મધરાતે આ ટ્રેલરને પોલીસ સ્ટેશને લઈ જઈ તેમાં રહેલી શરાબની પેટીઓ બહાર કઢાઈ ગણતરી કરાઈ હતી.

પોલીસે પકડેલાં ડ્રાઈવર શ્રવણકુમાર પુરારામ મેઘવાલ (રહે. ચૌહટન, બાડમેર, રાજસ્થાન)એ પ્રાથમિક પૂછપરછમાં જણાવ્યું કે સાંચોરના નારાયણ દિપારામ જાટે તેના માણસ મારફતે તેને બાડમેરમાં દારૂ ભરેલું ટ્રેલર મોકલાવીને સામખિયાળી લઈ જવા જણાવેલું. 

શ્રવણે પાંચ હજાર રૂપિયા મહેનતાણું આપવાનું કહીને પોતાની સાથે ક્લિનર તરીકે ચેનારામ ડોલુરામ જાટને સાથે લીધો હતો.

ડ્રાઈવર શ્રવણકુમારે કબૂલ્યું કે અગાઉ ૧૯ જૂલાઈના રોજ નારાયણ જાટના કહેવાથી આ જ રીતે દારૂ ભરેલી ગાડી લઈને કચ્છ આવેલો. સામખિયાળી ટોલ નાકું પસાર કરીને બસ્સો મીટર આગળ જઈને ગાડી ઊભી રાખેલી. ત્યારબાદ નારાયણ જાટના કહેવાથી અજાણ્યો માણસ આવેલો.

માલ ખાલી કરીને અજાણ્યો માણસ બીજા દિવસે તેને ટ્રેલર પાછું આપી ગયેલો.

પોલીસે ટ્રેલરની તલાશી લેતાં તેમાંથી ડીઝલ ભરાવવા માટે અપાયેલાં ૧૦ હજાર રોકડાં રૂપિયા, આરસી બૂક, ઈન્સ્યોરન્સ પૉલિસી વગેરે દસ્તાવેજો મળી આવ્યાં હતા. આ દસ્તાવેજો મુજબ પકડાયેલા ટ્રેલરનો નંબર RJ-19 GJ-3940 છે પરંતુ પોલીસની આંખમાં ધૂળ નાખવા માટે ટ્રેલર પર GJ-08 Y-7835 નંબરની ખોટી નંબર પ્લેટ લગાડાઈ હતી.

રસ્તામાં ગાગોદર પાસેની હોટેલ પર કુદરતી હાજત કરવા માટે રોકાયાં હતા ત્યારે બાતમીના આધારે SMCએ ત્રાટકી હતી. શરાબ ઉપરાંત ૩૦ લાખનું ટ્રેલર, ૧૧ હજાર ૯૩૦ રોકડાં રૂપિયા, ૧૦ હજારના બે મોબાઈલ ફોન વગેરે મળીને કુલ ૭૮.૫૭ લાખનો મુદ્દામાલ કબજે કરવામાં આવ્યો છે.