મરનાર વિનય યાદવ વેલસ્પનમાં લેબર કોન્ટ્રાક્ટર હતો. મોટા ભાઈ અજય જોડે ભાગીદારીમાં વતનથી લેબરો મગાવતો હતો. વિનયની હત્યા બાદ પોલીસે અજયનો સંપર્ક કરી વિનયની હત્યા થઈ હોવાની જાણ કરીને અંતિમવિધિ માટે તેના મૃતદેહને લઈ જણાવ્યું હતું.

વિનયની હત્યા કોણે કરી તે અંગે પોલીસ સીસીટીવી ફૂટેજ અને બાતમીદારો મારફતે માહિતી મેળવવા સક્રિય હતી.

બનાવ સમયે અજયે પોતે ઝારખંડમાં હોવાનું જણાવ્યું હતું. પરંતુ, અંજારની એક દુકાન કે જ્યાંથી વિનયની હત્યા માટે વપરાયેલું દાતરડાં જેવું તીક્ષ્ણ હથિયાર ખરીદાયું હતું તે દુકાનના સીસીટીવી ફૂટેજને ચેક કરતાં હથિયાર ખરીદનારો અજય હોવાનું પ્રતિપાદિત થયું હતું. પોલીસે પૂછપરછ કરતાં અજય ગુનો કબૂલી લીધો.

પોલીસે જણાવ્યું કે બેઉ ભાઈ ભાગીદારીમાં લેબર કોન્ટ્રાક્ટર તરીકે કામ કરતાં હતાં પરંતુ નાનો ભાઈ વિનય લાંબા સમયથી મોટા ભાઈ અજયને લેવાના બાકી નીકળતાં ત્રણેક લાખ રૂપિયા આપતો નહોતો. આ મામલે બેઉ ભાઈ વચ્ચે અવારનવાર ફોન પર શાબ્દિક ચકમક ઝરતી રહેતી હતી. એટલું જ નહીં, વિનયે ધંધામાંથી મોટા ભાઈ અજયને બેદખલ કરી દીધો હતો. ઝારખંડ રહેતો અજય ગૂપચૂપ રીતે હત્યાના આગલા દિવસે અંજાર આવ્યો હતો. વિનય પૈસા ના આપે તો તેને પતાવી દેવાના હેતુથી હથિયાર ખરીદેલું. 25મી એપ્રિલની રાત્રે વિનયની ઘાતકી હત્યા કરીને અજય પરત વતન તરફ સરકી ગયો હતો.

એસપી સાગર બાગમાર, પ્રોબેશનર આઈપીએસ વિકાસ યાદવ, ડીવાયએસપી મુકેશ ચૌધરીના માર્ગદર્શનમાં અંજાર પોલીસ ઈન્સ્પેક્ટર એ.આર. ગોહિલ, પીએસઆઈ એસ.જી. વાળા સહિતનો સ્ટાફ સફળ ડિટેક્શનમાં જોડાયો હતો.