અંજાર પીઆઈ એ.આર. ગોહિલે આપેલી માહિતી મુજબ આરોપી રીયા ઈશ્વરભાઈ ગોસ્વામીના નામે બોલતી એક સ્કોર્પિયો કાર અને મેઘપર બોરીચીમાં આવેલો અઢી લાખનો પ્લોટ, આરતીના નામે અંજારના દેવનગર (રેવન્યૂ સર્વે નં. ૬૬૮)માં નોંધાયેલો ૬.૪૫ લાખનો પ્લોટ અને તેમની માતા તારાબેનના નામે મેઘપર બોરીચીના આશાપુરાનગરમાં લેવાયેલો ૬૦ હજારની કિંમતનો પ્લોટ મળી કુલ ત્રણ પ્લોટ અને એક કાર મળી અંદાજે ૨૪.૩૭ લાખના મૂલ્યની ચલ અચલ સંપત્તિ ટાંચમાં લેવાઈ છે.

રીયા સામે વર્ષ ૨૦૨૦થી અત્યારસુધીમાં ગેરકાયદે ઊંચા વ્યાજે નાણાં ધીરધાર, પઠાણી ઊઘરાણી અંતર્ગત ધાક-ધમકી કરવી, હુમલા કરવા, માનસિક ત્રાસ આપી મરવા મજબૂર કરવા સબબની બે ફરિયાદો સહિત દસથી વધુ ફરિયાદો નોંધાયેલી છે. આરતી અને તેમના ભાઈ તેજસ સામે પણ સાતથી વધુ ગુના નોંધાયેલાં છે.

રેન્જ આઈજી ચિરાગ કોરડીયા અને પૂર્વ કચ્છ એસપી સાગર બાગમારે આપેલી સૂચનાના આધારે અંજાર ડીવાયએસપી મુકેશ ચૌધરીએ અંજાર પોલીસની મદદથી ત્રણે ભાઈ બહેનોની ગુનાહિત કુંડળી કાઢીને ત્રણે જણ ‘સંગઠિત ગેંગ’ તરીકે ગુના આચરતા હોવા સબબ ૦૬-૦૯-૨૦૨૪ના રોજ ‘ગુજસીટોક’નો ગુનો નોંધીને ત્રણેને અંદર કરી દીધાં હતાં.

ગુજસીટોકમાંથી બહાર આવ્યાં બાદ ગત ૨૬-૦૨-૨૦૨૫ના રોજ ત્રણે ભાઈ બેનને ‘પાસા’માં ફીટ કરાયાં હતાં.