ફરિયાદી વિજયસિંહ ગૌડ (રહે. કોરબા, છત્તીસગઢ)એ પોલીસને જણાવ્યું કે તે અને તેનો કૌટુંબિક ભત્રીજો સરવનસિંહ ઈતવારસિંહ, આરોપી રાજકુમાર ભોલા (રહે. કટની, મધ્યપ્રદેશ) સહિતના ૬ મજૂરો દસ નંબરની ઓરડીમાં રહે છે.

તેમની બોલાચાલી સાંભળીને ફરિયાદી ઉઠી ગયો હતો અને બેઉની શાંત પાડી સૂઈ ગયો હતો. અડધો પોણો કલાક બાદ રૂમમાં રહેતા સાથી મજૂર પ્રમોદે તેને ઊંઘમાંથી ઉઠાડ્યો હતો. પ્રમોદે તેને જણાવ્યું હતું કે સરવન અને રાજકુમાર ફરી ઝઘડ્યાં છે અને રાજકુમારે તેના માથામાં લોખંડની પાઈપ ફટકારી દેતાં તે રૂમ બહાર નીચે પડી ગયો છે.

બનાવના પગલે સિક્યોરીટી ગાર્ડ દોડી આવ્યો હતો અને રાજકુમારના હાથમાંથી પાઈપ છીનવી લઈને એમ્બ્યુલન્સ બોલાવી હતી. સરવનને તત્કાળ સામખિયાળીની ખાનગી હોસ્પિટલમાં લઈ જવાયો હતો પરંતુ હોસ્પિટલે તેને ભચાઉ સરકારી હોસ્પિટલમાં રીફર કર્યો હતો.

ઘટના અંગે જાણ થતાં મધરાત્રે ભચાઉના પીઆઈ એ.એ. જાડેજા સહિતની ટીમ ઘટનાસ્થળે દોડી ગઈ હતી. સૂત્રોના જણાવ્યા મુજબ આરોપીને રાઉન્ડ અપ કરી લેવાયો છે. ડીવાયએસપી સાગર સાંબડાના માર્ગદર્શનમાં પોલીસે બનાવ અંગે ગહન તપાસ શરૂ કરી છે.