દવેએ રજૂઆત કરી છે મતદાર યાદી સુધારણા કાર્યક્રમના ખાસ ચાર દિવસો દરમિયાન એકપણ અરજી બીએલઓને મળી નહોતી. પરંતુ, કાર્યક્રમ પૂરો થયાના અમુક દિવસો બાદ સીધા પ્રાંત અધિકારીની કચેરીમાં ફોર્મ નંબર ૭ જમા કરાવી દેવામાં આવેલાં. આ બાબત શંકાસ્પદ છે.

મેહુલભાઈએ પત્રમાં લખ્યું છે કે ૮૮ મતદારોના નામ કમી કરાવવા માટે જે ફોર્મ નંબર ૭ રજૂ કરાયાં છે તેને તપાસતાં જાણવા મળ્યું છે કે જે મતદારોના નામ સામે વાંધો ઉઠાવવામાં આવ્યો છે તે તમામ મતદારો અંજાર વિધાનસભા ભાગ નંબર  ૨૫૩ (નયા અંજાર વિસ્તાર)ની વિવિધ સોસાયટીમાં વર્તમાનમાં રહેતાં રહેવાસીઓ છે.

એ જ રીતે, નિયમ મુજબ એક વાંધેદાર એકસાથે પાંચ ફોર્મ ભરી શકે છે પરંતુ રજૂ થયેલાં ફોર્મ જોતાં આઠ અરજદારે એકસાથે ૧૦-૧૦ ફોર્મ ભર્યાં છે અને એક અરજદારે ૮ ફોર્મ રજૂ કર્યાં છે.

ફોર્મ ભરનારાં ૯ અરજદારે ફોર્મ સાથે જે પોતાના ચૂંટણી ઓળખપત્રની નકલ રજૂ કરી છે તેની ખરાઈ કરતાં કેવળ ૩ જ ચૂંટણી ઓળખપત્ર સાચાં નીકળ્યાં છે, બાકીના ૬ ચૂંટણી કાર્ડનો કોઈ જ ડેટા ઓનલાઈન જોવા મળતો નથી. એ જ રીતે, ફક્ત ૩ જ મોબાઈલ નંબર કાર્યરત છે અન્ય ૬ મોબાઈલ નંબર અસ્તિત્વમાં જ નથી. અમુક ફોર્મમાં મોબાઈલ નંબર દસના બદલે નવ આંકડાના છે તો ચૂંટણી કાર્ડમાં પ્રથમ ત્રણ આલ્ફાબેટ પછી સાત આંક આવે તેના બદલે ક્યાંક છ અંક છે તો ક્યાંક આઠ અંક છે.

જે મતદારોના નામ સામે વાંધા ફોર્મ ભરવામાં આવ્યા છે તે પૈકી મોટાભાગના મતદારો એક જ સોસાયટી કે વિસ્તારના રહેવાસીઓ છે.

ચોક્કસ વ્યક્તિ કે સમૂહ દ્વારા શિક્ષકો દ્વારા કરવામાં આવેલી મતદાર યાદી સઘન સુધારણાની કામગીરી બગાડવા માટે અથવા તો આગામી ચૂંટણીને ધ્યાને લઈ બહાર પડનારી નવી મતદાર યાદી સાથે છેડછાડ કરવાના આયોજનપૂર્વકના હેતુ સાથે આ ફોર્મ ભરવામાં આવ્યાં છે.

જો કોઈ બીએલઓ દ્વારા કામગીરીમાં ચૂક થાય તો તેને લોકપ્રતિનિધિત્વ ધારા હેઠળ નોટિસ આપી ખુલાસો પૂછવામાં આવે છે ત્યારે આ ખોટાં ફોર્મ રજૂ કરનાર લોકો સામે પણ લોક પ્રતિનિધિત્વ ધારાની કલમ હેઠળ ફોજદારી ફરિયાદ નોંધાવવામાં આવે તે અપેક્ષિત છે. મેહુલભાઈએ તેમના પત્રની નકલ અંજારના ચીફ ઑફિસર, આડા, કચ્છ કલેક્ટર અને મુખ્યમંત્રીને પણ મોકલી આપી છે. બીએલઓની આ રજૂઆત ‘વોટ ચોરી’ના સુવ્યવસ્થિત ષડયંત્રનો પર્દાફાશ કરી રહી છે. પરંતુ, ચૂંટણી અધિકારીઓના મોંઢે ખંભાતી તાળાં લટકે છે.

ભારતના બંધારણે આપેલા મત અધિકાર અને લોકશાહીને બચાવવા માટે કચ્છની જનતા જાગે તે સમયની માગ છે તેવો અનુરોધ કરી, રાહુલ ગાંધીએ સરના નામે વોટ ચોરીના જે દેશવ્યાપી કૌભાંડનો પર્દાફાશ કર્યો છે તે જ આ કૌભાંડ હોવાનું જિલ્લા કોંગ્રેસ પ્રમુખ વી.કે. હુંબલે જણાવ્યું છે. કોંગ્રેસે વોટ ચોરીના કારસા સામે આવતીકાલ ગુરુવારે ભુજ કલેક્ટર કચેરી ખાતે બપોરે ત્રણથી પાંચ વાગ્યા સુધી ધરણાંનું આયોજન કર્યું છે. જેમાં જિલ્લા અને તાલુકા સંગઠન, વિવિધ પાંખ-સેલના હોદ્દેદારો અને ચૂંટાયેલા જન પ્રતિનિધિઓ જોડાશે.