નાના દિનારાનો જાવેદ અલાના સમા શેઠ શકુર સમાની બોલેરોના ડ્રાઈવર તરીકે નોકરી કરે છે. જાવેદ નેશનલ થર્મલ પાવર કોર્પોરેશનના પેટામાં કાર્યરત ઠેકેદાર ફલૌદી કંપનીના મજૂરોને બોલેરો પિકઅપથી કાળા ડુંગરની ભારત હોટેલથી રોજ RE પાર્ક લાવવા મૂકવાનું કામ કરે છે.

RE પાર્કની ચેકપોસ્ટથી એકાદ કિલોમીટર દૂર પહોંચ્યો હતો ત્યાં એક ડમ્પરવાળો પૂરઝડપે તેની બોલેરોને ઓવરટેક કરીને આગળ નીકળ્યો હતો. જાવેદ વધુ કંઈ સમજે તે પહેલાં જ સામેથી પૂરઝડપે આવી રહેલી GJ-39 T-6545 નંબરની બલ્કર ટ્રક સીધી બોલેરોને ટકરાઈ ગયેલી.

બલ્કરનો ડ્રાઈવર પણ ગંભીર રીતે ઘવાયો હતો અને તેને ભુજની અન્ય હોસ્પિટલમાં સારવાર માટે ખસેડાયો હતો.  

ઘટનાની જાણ થતાં જ ખાવડાના પોલીસ ઈન્સ્પેક્ટર એમ.બી. ચાવડા, પીએસઆઈ બી.એ. ડાભી સહિતનો સ્ટાફ સ્થળ પર દોડી ગયો હતો. પીઆઈ ચાવડાએ જણાવ્યું કે સ્થળ પરનું દ્રશ્ય જોઈને બે-ઘડી તેઓ હચમચી ઉઠ્યાં હતા. ચોતરફ ઘાયલોની દર્દનાક ચીસો સંભળાતી હતી. જ્યાં નજર પડે ત્યાં લોહી દેખાતું હતું. બોલેરોનો અડધો ભાગ બલ્કરની નીચે ઘૂસી ગયો હતો. પોલીસે તત્કાળ ૧૦૮ એમ્બ્યુલન્સ સર્વિસને ઘટનાની ગંભીરતા જણાવી હતી. થોડીકવારમાં જ રાત્રિની નિરવ શાંતિને ચીરતી એમ્બ્યુલન્સોની સાયરનોથી આખો વિસ્તાર ગાજી ઉઠ્યો હતો.

પાંચ લાશો બહાર પડેલી અને બે લાશો બોલેરો સાથે ટ્રક નીચે ખરાબ રીતે ફસાઈ ગયેલી જણાતી હતી. મધરાતે પોલીસે બે ક્રેઈન મગાવી ટ્રકને ઊંચી કરવા પ્રયાસ કરેલો. પટ્ટો તૂટી જતાં ત્રીજી ક્રેઈન મગાવી આખરે બલ્કર ટ્રકને દૂર કરાઈ હતી. જો ખાવડા પોલીસે સતર્કતા દાખવીને સમયસર કામગીરી કરીને ઘાયલોને હોસ્પિટલે ના પહોંચાડ્યા હોત તો કદાચ મરણાંક ઊંચો હોત.

જિલ્લા કલેક્ટર અને એસપી પણ ભુજમાં જી.કે. જનરલ હોસ્પિટલે દોડી ગયાં હતા.

મૃતકોમાં બિરેશ જગદેવ પાસવાન (૨૨, રહે. સીતાપુર, યુપી) દેશરાજ સુરજલાલ પાસવાન (ઉ.વ. ૪૮, રહે. સીતાપુર), સંદિપકુમાર હોલીરામ પાસવાન (રહે. સીતાપુર), કુલદીપકુમાર રામકુમાર પાસવાન (ઉ.વ. ૩૧, રહે. સીતાપુર), અનુપ ચેતરામ પાસવાન (૨૪, બહરાઈચ, યુપી), અનિલ રામપાલ પાસવાન અને કૈલાસ રામધન મંડલ (૪૬, બગડીયા, બિહાર)નો સમાવેશ થાય છે.

બોલેરો પિક-અપનો ઉપયોગ માલ-સામાનના પરિવહન માટે થાય છે પરંતુ આ બનાવથી સ્પષ્ટ છે કે બોલેરોનો ગેરકાયદે રીતે પેસેન્જર વાહન તરીકે ઉપયોગ થતો હતો અને ગરીબ મજૂરોને તેમાં ઠાંસી ઠાંસીને ભરવામાં આવતા હતા.

શ્રમિકોના લેવા મૂકવા માટે વાહનોની વ્યવસ્થા કરવા ઠેકેદારો અને કંપનીઓને ફરજ પાડવી જોઈએ. એ જ રીતે, નશો કરીને બેફામ દોડતાં વાહનચાલકો સામે દૈનિક ધોરણે કડક કાર્યવાહી કરાય તે પણ આવશ્યક છે. ભૂતકાળમાં નશાખોર ડ્રાઈવરો સામે ખાવડા, લુડિયા પંથકના ગ્રામજનોએ સ્વયંભૂ રાત્રિ પહેરો ગોઠવીને તેમને ઠમઠોર્યાં હતા.