વક્રતા એ છે કે આ માહિતી કદાચ બહાર આવી જ ના હોત પરંતુ ખુદ પોલીસે જ આ વિગતો જાહેર કરી છે! ગૃહમંત્રીની વાહ વાહી કરવા જતાં પોલીસે અજાણતાં જ આ પોન્ઝી સ્કિમના ફ્રોડની વિગતો જાહેર કરી છે!

પશ્ચિમ કચ્છ પોલીસ દળના અધીક્ષક વિકાસ સુંડાએ આજે કેમેરા સામે એક ઈન્ટરવ્યૂમાં એવી વિગતો આપી છે કે નાયબ મુખ્યમંત્રી હર્ષ સંઘવીના ‘લોક સંવાદ’ કાર્યક્રમમાં મુંદરાના આશાબેન સિધ્ધપુરાએ તેમના નાણાં ફસાઈ ગયાં હોવાની રજૂઆત કરેલી. જેના પગલે પોલીસે ફક્ત ત્રણ જ દિવસની અંદર કાર્યવાહી કરીને આ મહિલાના ફસાયેલાં ૩૬.૫૦ લાખ રૂપિયા પરત અપાવી દઈને તેમની સમસ્યાનું નિરાકરણ લાવી દીધું છે.

કચ્છખબરે મુંદરામાં રહેતા આશાબેન સિધ્ધપુરા સાથે આ અંગે વાત કરી તો તેમણે જણાવ્યું કે તેમને ૩ દિવસમાં નહીં પરંતુ છેલ્લાં બે અઢી મહિનામાં ટુકડે ટુકડે ૩ વખત પોલીસે તમામ ૩૬.૫૦ લાખ પરત અપાવ્યાં છે! પોન્ઝી સ્કિમમાં ફસાયેલાં પોતાના નાણાં પરત અપાવવા બદલ તેમણે પોલીસ અને મંત્રીનો આભાર માન્યો.

આશાબેનની વાત પરથી જણાય છે કે મંત્રીની વાહ વાહી કરવા માટે પોલીસે ભ્રામક માહિતી જાહેર કરી છે. કેટલી ઝડપથી નાણાં પરત અપાવ્યાં તેના વિવાદને કોરાણે રાખીએ તો પણ એ બાબત સૌથી ગંભીર છે કે આવી પોન્ઝી સ્કિમમાં કચ્છના અનેક રોકાણકારોના કરોડો રૂપિયા ફસાયાં હોવાની આશંકા છે.

જો કોઈ કિસ્સામાં ભોગ બનનાર ફરિયાદ નોંધાવવા તૈયાર ના થાય તો પોલીસે ખુદ આવા ગંભીર ગુનાનું કોગ્નિઝન્સ લઈ સ્વેચ્છાએ સરકાર તરફે વિધિવત્ ફરિયાદ નોંધવી જ પડે. ફરિયાદ નોંધાયા બાદ કાયદાકીય રાહે રિકવરી થઈ જ શકે છે.

મુંદરામાં બ્યૂટી પાર્લર ચલાવતાં આશાબેને કહ્યું કે કે.ડી. એન્ટરપ્રાઈઝ નામની માંડવીની પેઢીએ પોતે સરકાર માન્ય હોવાના ગેરમાર્ગે દોરતાં દાવા કરીને એવી સ્કિમ શરૂ કરેલી કે માસિક એક હજાર રૂપિયા લેખે ત્રણ વર્ષ માટે પેઢીમાં નાણાંનું રોકાણ કરવાનું. પાકતી મુદ્દતે રોકાણના ૩૬ હજાર સાથે ૧૪ હજાર વ્યાજ મળી કુલ ૫૦ હજાર રૂપિયા મળે.

માંડવી રહેતા હેમપુરી ગોસ્વામી નામના સંચાલકે વાયદાબાજી શરૂ કરેલી. દરમિયાન, સંચાલકે ગળેફાંસો ખાઈ આપઘાત કરવાનો કથિત પ્રયાસ કરતાં પોતાના અને પોતે કરાવેલાં અન્યોના રોકાણની રકમ ફસાઈ ગઈ હોવાની આશાબેનની શંકા સુદ્રઢ થયેલી. તે ફરિયાદ નોંધાવવા ઈચ્છતાં નહોતાં. જેથી અંદાજે અઢી મહિના અગાઉ તેમણે ગાંધીનગરમાં ગૃહમંત્રીના જનસંવાદ કાર્યક્રમમાં આ અંગે રજૂઆત કરેલી. સંઘવીએ આ અંગે એસપીને સૂચના આપ્યાં બાદ પોલીસે હરકતમાં આવીને આશાબેનને તેમણે રોકેલી પૂરેપૂરી રકમ પરત અપાવી દીધી છે.

આશાબેને જણાવ્યું કે આ પેઢીમાં ભુજ, નખત્રાણા, માંડવી, મુંદરા સહિતના અગણિત લોકોએ રૂપિયાનું રોકાણ કર્યું છે. આ પેઢીનું રોજનું કલેક્શન જ દોઢથી બે કરોડ રૂપિયાનું હોવાનું આશાબેને ઉમેર્યું છે. આશાબેનને કોઈ જ FIR દાખલ કર્યાં વગર પોલીસે બારોબાર રૂપિયા પરત અપાવી જશ ખાટ્યો છે. પરંતુ, તેમ કરવા જતાં પોલીસ ખાતાંનો હરિરસ ખાટો થઈ ગયો છે! સમગ્ર મુદ્દે કચ્છખબરે પશ્ચિમ કચ્છ એસપીનો ફોન અને મેસેજથી વારંવાર સંપર્ક સાધવા પ્રયાસ કર્યો પરંતુ તેમનો પ્રતિભાવ સાંપડી શક્યો નથી.