દેશમાં પરંપરાગત પધ્ધતિએ મિથેનોલનું ઉત્પાદન કરતી આસામ પેટ્રો કેમિકલ્સ લિમિટેડ (APL) અને દીનદયાલ પોર્ટ ઑથોરીટી (DPA) વચ્ચે સૂચિત પ્લાન્ટના નિર્માણ માટે ગત ૨૯ જાન્યુઆરીના રોજ આસામના દિબ્રુગઢમાં સરમા અને સોનોવાલ વચ્ચે MoU થયાં હતા.

૨૩૦૦ કરોડના ખર્ચે નિર્માણ પામનારાં ઈ-મિથેનોલ પ્રોજેક્ટથી અંદાજે ૩૫૦૦ લોકોને પ્રત્યક્ષ અને પરોક્ષ રોજગાર મળશે. APL દ્વારા મિથેનોલનું ઉત્પાદન કરાશે અને DPA પાઈપલાઈન, કનેક્ટિવીટી, સ્ટોરેજ, ફ્યુઅલ હેન્ડલિંગ ઈન્ફ્રાસ્ટ્રક્ચરની સુવિધા ઉપલબ્ધ કરાવશે.

ઈ-મિથેનોલનો પુરવઠો વિશ્વના સૌથી વ્યસ્ત સમુદ્રી વેપારી માર્ગોમાંના એક એશિયા-યુરોપ ઈન્ટરનેશનલ ટ્રેડ કોરિડોરમાં આવ-જા કરતાં જહાજોને ઉપલબ્ધ કરાવાશે.

♦ગુજરાતના મુખ્યમંત્રી ભૂપેન્દ્ર પટેલે જણાવ્યું કે ગુજરાત ભારતનું વિશ્વ માટેનું પ્રવેશદ્વાર છે, હવે તે વિશ્વ માટે ગ્રીન એનર્જીનું પ્રવેશદ્વાર બનશે.

♦આસામના મુખ્યમંત્રી હિમંતા બિસ્વા સરમાએ જણાવ્યું કે આસામે ઓઈલ અને ચા દ્વારા ભારતને શક્તિ આપી છે, હવે ગ્રીન એનર્જી દ્વારા વિશ્વને શક્તિ આપશે. આ પ્રસંગે સરમાએ દ્વારકાના ભગવાન શ્રીકૃષ્ણ અને પૂર્વોત્તરની રૂક્મણિની કથા, તેજપુરની ઉષા અને અનિરુદ્ધની કથાનો ઉલ્લેખ કરીને આસામ અને ગુજરાત વચ્ચેના સદીઓ જૂનાં સાંસ્કૃતિક સંબંધોનો પણ ઉલ્લેખ કર્યો હતો.

♦શિપીંગ મિનિસ્ટર સર્બાનંદા સોનોવાલે જણાવ્યું કે ભારત વિશ્વની અગ્રણી દરિયાઈ શક્તિ તરીકે આગળ વધી રહ્યું છે, હવે તે વિશ્વના જહાજોને ગ્રીન એનર્જી પૂરી પાડશે. આ પ્લાન્ટ વડાપ્રધાન નરેન્દ્ર મોદીના ૨૦૭૦ સુધીમાં ભારતને ‘નેટ ઝીરો એમિસન’ બનાવવાના સ્વપ્નને સાકાર કરવામાં મહત્વપૂર્ણ બની રહશે. કંડલાનો આ પ્લાન્ટ વૈશ્વિક શિપિંગ ક્ષેત્રમાં ગ્રીન એનર્જીના નિકાસકાર તરીકે ભારતની સ્થિતિને સુદ્રઢ કરશે.

ગાંધીધામના DPA એક્ઝિબિશન ગ્રાઉન્ડ ખાતે શિલાન્યાસ સમારોહ યોજાયો હતો. જેમાં કચ્છના સાંસદ વિનોદ ચાવડા, ગાંધીધામ, રાપર અને માંડવીના ધારાસભ્યો, આસામ પેટ્રો કેમિકલ્સના ચેરમેન બિકુલ ડેકા, દીનદયાળ પોર્ટ ઑથોરિટીના ચેરમેન સુશીલ કુમારસિંઘ સહિતના મહાનુભાવો ઉપસ્થિત રહ્યાં હતા.