ગુનાનો ભોગ બનનાર સગીરાના પિતાએ નોંધાવેલી ફરિયાદમાં જણાવ્યું છે કે તેમની ૧૩ વર્ષ ૩ માસની દીકરીને વિપુલ ગોહિલ અવારનવાર હેરાન પરેશાન કરી ધમકી આપતો હતો કે જો તું મારી સાથે સંબંધ નહીં રાખે તો હું તને પરીક્ષામાં ઓછાં માર્ક્સ આપીશ. આવી ધમકીઓ આપીને તેણે સગીર છાત્રા સાથે અવારનવાર દુષ્કર્મ આચર્યું હતું.

૧૫ ઑગસ્ટના બે દિવસ પૂર્વે દુષ્કર્મના આરોપી આચાર્યના ખિસ્સામાંથી અચાનક પ્રેગનન્સી ટેસ્ટ કીટ નીચે પડી ગયેલી. સીસીટીવીના આધારે આ કીટ આચાર્યના ખિસ્સામાંથી બહાર પડી હોવાની જાણ થયાં બાદ સમગ્ર મામલો સંસ્થાના સંચાલકોના ધ્યાને આવેલો. ૨૪ ઑગસ્ટના રોજ આરોપી આચાર્યને સંસ્થાએ સેવામુક્ત કર્યો હતો.

જવાબદાર સંચાલકોએ બનાવને દબાવી દેવાના હેતુથી પોલીસ કે અન્ય કોઈ જવાબદાર સંસ્થાને જાણ કરી નહોતી. ઘટના અંગે જાણ થયાં બાદ છાત્રાના વાલી દીકરીને ત્યાંથી ઘરે લઈ ગયાં હતા.

સમાજના લોકોએ પણ એકઠાં થઈ ભોગ બનનાર પીડિતા અને પરિવારને હૂંફ આપી જવાબદારોને નશ્યત અપાવવા ફરિયાદ નોંધાવવા જણાવ્યું હતું. આ સંસ્થાના પ્રમુખ તરીકે અમદાવાદના ડૉ. રાજેન્દ્ર ખીમાણી સેવા આપે છે. ખીમાણી ગૂજરાત વિદ્યાપીઠના પૂર્વ કુલનાયક છે અને યુનિવર્સિટી ગ્રાન્ટ કમિશને માર્ચ ૨૦૨૨માં તેમની નિમણૂકને ગેરકાયદે ગણાવી કુલનાયક પદેથી હટાવવા સૂચના આપતાં ભારે વિવાદ સર્જાયો હતો.