૨૫-૦૩-૨૦૨૦ની બપોરે દોઢ વાગ્યે ઈબ્રાહિમ તુર્કે તાલુકા આરોગ્ય અધિકારીની કચેરીએ જઈને પોતે પત્રકાર હોવાનો રોફ ઝાડીને સિનિયર ક્લાર્ક તૈયબભાઈ અને હરીશ રાઠોડ જોડે માથાકૂટ કરેલી કે તમે લોકો અદાણી પોર્ટ અને વિલ્માર રિફાઈનરી આસપાસના વિસ્તાર તથા આસપાસના ગામોમાં કેમ દવા છાંટતા નથી? તેની ધાક ધમકીથી સ્ટાફ ડરી ગયેલો.

પોલીસે પૂછપરછ કરતાં તુર્કે એક છાપાનું ઓળખપત્ર બતાડેલું પરંતુ તે ઓળખપત્રની અવધિ ૩૧ ડિસેમ્બર ૨૦૧૮ના રોજ પૂર્ણ થઈ ગયેલી હતી.

આ ગુનામાં સરકાર તરફે ૧૧ સાક્ષીઓ તપાસી મદદનીશ સરકારી વકીલ કે.એમ. પ્રજાપતિએ ઈબ્રાહિમ તુર્કને કડકમાં કડક સજા ફટકારવા રજૂઆત કરી હતી.

આવા આરોપીને યોગ્ય નશ્યત કરવામાં ના આવે તો તેઓ કાયદાનો ડર રાખ્યા વગર આવા ગુનાઓ બેરોકટોક રીતે આચર્યાં કરે છે. ઈબ્રાહિમ તુર્કે પ્રેસ રિપોર્ટર ના હોવા છતાં કોરોના મહામારીના કપરા સમયે પ્રેસ રિપોર્ટર હોવાનું જણાવી આરોગ્ય કચેરીના સ્ટાફને ભયભીત કરવાના ઈરાદે તેમના પર રોફ જમાવવા પ્રયાસ કરેલો. આવા ગુના ભાગ્યે જ પુરવાર થાય છે.

આવા કિસ્સામાં મહત્તમ સજા કરવામાં આવે તો આવા ગુના આચરનારા અન્ય આરોપીઓમાં ડર બેસે અને તેઓ આવા ગુના આચરવાનું ટાળે તેમ જણાવી કૉર્ટે તેને સજા ફટકારી છે. ચુકાદા સમયે બોગસ પત્રકાર તુર્ક કૉર્ટમાં હાજર ના હોઈ કૉર્ટે અરેસ્ટ વૉરન્ટ ઈસ્યૂ કરી મુંદરા પીઆઈને તેની તાકીદે બજવણી કરવા હુકમ કર્યો છે.