પોલીસે પંકજ અને ગીતમની વિશિષ્ઠ ઢબે પૂછપરછ કરતાં ગુનો આચરીને નાસી છૂટેલાં સતિષ શિકરવાર (મુરૈના, એમપી), રાજેશ ઊર્ફે મોન્ટુ નરેશ પટેલ (ધોલપુર) અને બચ્ચાં નામના ત્રણ આરોપીની સંડોવણી સ્પષ્ટ થયેલી.

ત્યારબાદ વેશપલટો કરીને એક ઑટો રીક્ષામાં બેસીને ગાંધીધામ જતી બસમાં બેસેલી. ગાંધીધામ રેલવે સ્ટેશન પર ઉતરીને આ ત્રિપુટી ટ્રેનના જુદાં જુદાં લોકલ ડબ્બામાં બેસીને કચ્છ બહાર નાસી છૂટી હતી.

ત્રિપુટીને ઝડપી લેવા માટે લોકલ ક્રાઈમ બ્રાન્ચ અને સ્પેશિયલ ઓપરેશન ગૃપની જુદી જુદી ટીમ ઉત્તર પ્રદેશના આગ્રા, અલીગઢ, મથુરા, વૃંદાવન તથા મધ્યપ્રદેશના મુરૈના, ચંબલની ઘાટીઓ તથા રાજસ્થાનના ધોલપુર, ભરતપુર, બાડી-બસેડીમાં ૧૪ દિવસ સુધી ફરતી રહી હતી.

ખૂંખાર અપરાધીઓને પોલીસની હાજરીની ગંધ ના આવી જાય તે માટે પોલીસ ક્યારેક વેશપલટો કરીને રીક્ષાચાલક તરીકે તો ક્યારેક શાકભાજી વેચનારાં ફેરિયાં તરીકે ફરતી રહેલી. મોન્ટુ ગુર્જર સમાજનો હોવાનું જાણીને પોલીસે ગુર્જર સમાજની પણ વેશભૂષા ધારણ કરી તેને શોધવા પ્રયાસ કરેલો.

ત્રિપુટી પૈકી સતિષ શિકરવાર અને મોન્ટુ બેઉ જણે આગ્રાના ફતેહાબાદમાં યુસુફ ઊર્ફે ટલ્લે શરીફખાનના ઘેર આશરો મેળવ્યો હોવાનું પોલીસની રેકીમાં સ્પષ્ટ થયેલું. પોલીસે ધાવો બોલાવીને બેઉને યુસુફના ઘરમાંથી ઝડપી પાડ્યાં હતા. ગંભીર ગુનાના આરોપીઓને આશરો આપવાના આરોપસર પોલીસ યુસુફને પણ પકડી લાવી છે.

હજુ આ ગુનાનો ત્રીજો આરોપી બચ્ચાં ઝડપાયો નથી. ઝડપાયેલો સતિષ શિકરવાર લૂંટ અને ધાડનો રીઢો અપરાધી છે. રાજકોટમાં જ્વેલર્સની દુકાનમાં થયેલી સાડા ત્રણ કરોડની લૂંટ કેસ સહિતના બે ગુના ઉપરાંત સુરત, મધ્યપ્રદેશ અને રાજસ્થાનમાં તેના ઉપર લૂંટ, ધાડ, આર્મ્સ એક્ટ સહિતના ૧૪ ગુના નોંધાયેલાં છે. 

જો કે, ગહન ઓપરેશન બાદ વધુ બે આરોપી ઝડપાઈ ગયાં તેનો પોલીસને સંતોષ છે. સમગ્ર ઓપરેશનમાં એલસીબીના પીઆઈ એ.એમ. મકવાણા, પીએસઆઈ મહિપાલસિંહ શિણોલ, એસઓજીના પીઆઈ એ.ડી. પરમાર તથા સ્ટાફ જોડાયો હતો.