ઝૈનુલ કાજાણી મૂળ ગિર સોમનાથ જિલ્લાના ઉનાનો રહેવાસી છે. તેને તબીબ બનવું હતું પરંતુ ભારતમાં મેળ પડે તેમ ના હોઈ તે યુક્રેનમાં ભણવા ગયો હતો. જો કે, અભ્યાસના અંતિમ વર્ષમા હતો તે સમયે વતનમાં પિતાનું મૃત્યુ નીપજ્યાં બાદ તે વતન આવેલો અને પછી વિવિધ કારણોસર તે યુક્રેન પરત જઈ મેડિકલનો અભ્યાસ પૂરો કરી શક્યો નહોતો.

ડૉક્ટર તરીકેનું સપનું ગમે તે ભોગે પૂરું કરવાના આશયથી તે નકલી ડૉક્ટર બન્યો હતો. શરૂઆતમાં તે ઉત્તરાખંડ ગયો હતો અને અહીંની કેટલીક કંપનીઓમાં નોકરી કરી હતી. ડૉક્ટર તરીકે ભારતમાં કેવી રીતે રજિસ્ટ્રેશન થાય છે તે જાણવા માટે ઉત્તરાખંડની કેટલીક ખાનગી હોસ્પિટલમાં તે નોકરી પર લાગ્યો હતો. એક હોસ્પિટલના તબીબને તેની વર્તણૂક શંકાસ્પદ જણાતા તેને દસેક દિવસમાં જ નોકરીમાંથી હાંકી કાઢ્યો હતો.

ગુગલ પર સર્ચ દરમિયાન તેને ગુજરાત મેડિકલ કાઉન્સિલમાં રજિસ્ટર થયેલા એક તબીબનું પ્રમાણપત્ર મળી જતાં તેને ડાઉનલોડ કરી લીધેલું. તે પ્રમાણપત્રના રજિસ્ટ્રેશન નંબર અને નામમાં ચેડાં કરીને પોતાનું નામ ઘૂસાડી દીધું હતું. નકલી ડૉક્ટર બન્યા બાદ સામાજિક રાહે રાજકોટ રહેતી નિરીશા નામની યુવતી સાથે સામાજિક રીતરસમો મુજબ અરેન્જ મેરેજ કર્યાં હતા.

જો કે, હજુ સઘન તપાસ ચાલું છે. ગામના પૈસા ઉઘરાવીને તેણે શું કર્યું તે મામલે સીઆઈડી ક્રાઈમ સઘન પૂછપરછ કરી રહી છે.

પોતાને કોઈ ઓળખે નહીં અને લોકોને તબીબ તરીકે ‘બાટલીમાં ઉતારવા’ તે ભુજ આવેલો. ભુજમાં હોસ્પિટલ ખોલીને લોકોને સારો નફો થવાના આંબા આંબલી બતાડીને તેણે હોસ્પિટલમાં પચાસ ટકાના ભાગના બિઝનેસ પાર્ટનર બનાવીને રૂપિયા પડાવવાનું શરૂ કરેલું. જો કે, ગામમાં ઝૈનુલના કાંડની ગંધ ધીમે ધીમે ફેલાવા માંડતા ઈન્વેસ્ટરોએ રૂપિયા પરત માગવાનું શરૂ કરતાં તેના માટે હોસ્પિટલને તાળાં મારી નાસી જવા સિવાય બીજો કોઈ આરો રહ્યો નહોતો.

દરમિયાન, ગત ફેબ્રુઆરી માસમાં ભચાઉ પોલીસ મથકે તેની સામે ફરિયાદ નોંધાઈ હતી. લાંબો સમય નાસતો રહ્યાં બાદ તે ભરુચ આવ્યો હતો અને પહેલાંથી તેના પર વૉચ રાખીને બેઠેલી સીઆઈડી ક્રાઈમે તેને ઉઠાવી લીધો હતો. સીઆઈડીના ડીવાયએસપી એમ.એસ. ગોહેલના માર્ગદર્શનમાં પીઆઈ એમ.પી. હુંબલ અને પીઆઈ કે.સી. રાઠોડની ટીમ તપાસ કરી રહી છે.

ગામના પૈસે મોજ માણી રહેલા ઝૈનુલની વાકપટુતામાં ભુજના અનેક અગ્રણીઓ લપટાઈ ગયા હતા. ફેસબુક પર તેની હોસ્પિટલના પેજ પર તેણે વિવિધ ડિગ્રીઓ લખેલી છે.

રૂપિયા લઈને ગમે તેવા લોકોને ‘સજ્જન અને શ્રેષ્ઠી’ હોવાના પ્રમાણપત્રો આપવાની છાશવારે ‘માર્કેટીંગ ઈવેન્ટ’ યોજતા એક છાપાએ તેને ‘હેલ્થ આઈકોન’ તરીકે આપેલા પ્રમાણપત્રને પણ આ ગઠિયાએ ગામને ભરમાવવા ફેસબુક પર પોસ્ટ કરેલું છે.