રેન્જ આઈજી ચિરાગ કોરડીયાના માર્ગદર્શનમાં સાયબર સેલના પીઆઈ લક્ષ્મણસિંહ પી. બોડાણાના નેતૃત્વમાં વીસથી વધુ પોલીસ કર્મચારીઓના કાફલાએ ખેતરને ચોતરફથી ઘેરી લઈને કામગીરી શરૂ કરી હતી. સળંગ ચાર દિવસ અને રાતની મેરેથોન કામગીરીના અંતે આજે મોડી રાતે કામગીરી પૂર્ણ થઈ છે. પોલીસે ખેતરમાં ઉગેલાં તમામ છોડનું કાળજીપૂર્વક કટિંગ કરાવી, વજન કરાવી, પધ્ધતિસર મુદ્દામાલ તરીકે નંબર આપીને પંચો તથા એફએસએલ ટીમની હાજરીમાં સીઝ કર્યાં છે.

ભીમાસરના પ્રભુ ભાણાભાઈ સોઢાએ સરકારી ખરાબાની જમીન પર અફીણના છોડનું વાવેતર કર્યું હતું. જેમાં ઈશ્વર ડાયાભાઈ ગોયલ અને મનસુખ વજાભાઈ ગોયલે તેને મદદ કરેલી. પોલીસે દરોડો પાડ્યો ત્યારે આરોપીઓ અફીણના ડોડા (Poppy Pods)માં ચેકો મારીને તેમાંથી ઝરતો સફેદ દૂધ જેવો રસ (અફીણ) એકત્ર કરતા રંગેહાથ ઝડપાઈ ગયાં હતા.

♦અફીણના ડોડાના રસમાંથી મોર્ફિન, કોડેઈન અને થેબાઈન નામની ઔષધિનું નિર્માણ થાય છે. મોર્ફિન જબરદસ્ત પેઈનકિલર છે. કોડેઈનનો ઉપયોગ શરદી ઉધરસ અને હળવા દુઃખાવાની દવાઓ (કફ સિરપ)માં થાય છે. થેબાઈનનો ઉપયોગ અન્ય ઘણી દવાઓના નિર્માણમાં ઘટક તરીકે થાય છે.

♦ડોડામાંથી નીકળતો રસ સૂકાઈ જાય ત્યારે કાળા-કથ્થાઈ રંગનો ચીકણો પદાર્થ બને છે, જેને કાચું અફીણ (Opium) કહેવાય છે. ડ્રગ્સ માફિયાઓ આ રસ પર રાસાયણિક પ્રક્રિયા હાથ ધરીને તેમાંથી અત્યંત માદક પદાર્થ હેરોઈન અને બ્રાઉન સ્યુગર બનાવે છે.

♦રસ કાઢી લીધા બાદ જે સૂકાં ડોડા (Poppy Husk) વધે છે તેને પીસીને પાણીમાં પલાળી નશો કરવા પીવાય છે. ડોડાની અંદર જે બીજ (Seeds) હોય છે તે ખસખસ તરીકે ઓળખાય છે. ભારતમાં ખાસ કરીને શુધ્ધ ઘીના લાડુ પર ખસ ખસ ચોપડવામાં આવે છે. ખસ ખસમાં નશાનું પ્રમાણ હોતું નથી છતાં ખસ ખસવાળા લાડુ ખાધાં પછી લોકોને સરખું ઘેન ચઢતું હોય છે.

♦ભારતમાં અફીણની ખેતી, તેનો સંગ્રહ કે વેચાણ નાર્કોટિક્સ એક્ટ તળે ગુનો છે. માત્ર સરકારની વિશેષ મંજૂરી હેઠળ ફક્ત દવા બનાવવાના હેતુથી જ તેનું વાવેતર કરી શકાય છે.