આરોપીઓએ નાગજીના બાઈકને આંતરીને હુમલો કરી બાઈકમાં તોડફોડ કરેલી. આરોપીઓએ બંદૂક દેખાડી હોવાનું ફરિયાદમાં દર્શાવાયેલું. હુમલામાં નાગજીને ડાબા પગની ઘૂંટણમાં ફ્રેક્ચર અને માથામાં ગંભીર ઈજા થયેલી.

આ ગુનામાં ભચાઉના બીજા અધિક સેશન્સ જજ અંદલીપ તિવારીએ ઈપીકો કલમ ૩૨૬ હેઠળ હબીબ મામદ ખોખર, લતીફ ઈબ્રાહિમ ખોખર, અનવર ઈબ્રાહિમ ખોખર, રમજુ મામદ ખોખર, અભરામ ભચુભાઈ ખોખર (રહે. તમામ લાકડીયા)ને પાંચ વર્ષની સખ્ત કેદ સાથે પાંચ હજારનો દંડ ફટકાર્યો છે. એ જ રીતે, ઈપીકો કલમ ૩૨૩, ૩૨૪, ૩૨૫ હેઠળ ત્રણ વર્ષની કેદ સાથે બે હજાર રૂપિયાનો દંડ ફટકાર્યો છે.

તત્કાલિન પ્રોબેશનરી એએસપી બિપીન આહીરેએ ઈપીકો કલમ ૩૦૭ (હત્યાનો પ્રયાસ) ૧૪૭, ૧૪૮, ૧૪૯, ૩૨૩, ૩૨૪, ૩૨૫, ૪૨૭ (ગેરકાયદે મંડળી બનાવી, ઘાતક હથિયારો ધારણ કરી, એકસમાન ઈરાદો સિધ્ધ કરવા હથિયારોથી હુમલો કરી ગંભીર ઈજા પહોંચાડવી) અને આર્મ્સ એક્ટની કલમ ૨૫ (૧) બી (એ) હેઠળ સામખિયાળી પોલીસ મથકે ફરિયાદ દાખલ કરીને આરોપીઓની ધરપકડ, તપાસ કરી હતી.

♦કૉર્ટે ગુનો હત્યાના પ્રયાસની કલમ હેઠળનો ના હોવાનું જણાવી કહ્યું કે ઈજાનો પ્રકાર જીવલેણ નથી. ઘૂંટણની ઈજા ગંભીર છે પરંતુ સામાન્ય સંજોગોમાં તેનાથી માણસનું મૃત્યુ નીપજતું નથી. ફરિયાદ પક્ષે રજૂ થયેલાં મોટાભાગના પંચ સાક્ષીઓ અને સ્વતંત્ર સાક્ષીઓ ફરી ગયાં હતા.

♦કૉર્ટમાં પોલીસે એક તૂટેલી બંદૂક રજૂ કરેલી. ફરિયાદી પર ફાયરીંગ થયું નહોતું. પંચો સાક્ષીઓ બંદૂકને ઓળખી શકવામાં નિષ્ફળ રહ્યાં હતા. કૉર્ટે એ પણ નોંધ્યું કે આર્મ્સ એક્ટની કલમ હેઠળ જિલ્લા મેજિસ્ટ્રેટની પૂર્વમંજૂરી વગર ચાર્જશીટ ના થઈ શકે. પોલીસે આ કેસમાં કલેક્ટરની પૂર્વમંજૂરી મેળવી નહોતી. કૉર્ટે શંકાનો લાભ આપી આરોપીઓને આર્મ્સ એક્ટની કલમોમાંથી છોડી મૂક્યા છે.

♦મોટર સાયકલમાં તોડફોડ કરાઈ નુકસાન પહોંચાડાયું હોવાનું ફરિયાદ પક્ષ સિધ્ધ ના કરી શક્યો હોઈ કૉર્ટે ઈપીકો કલમ ૪૨૭ને પણ ઉડાવી દીધી છે.

♦કેસમાં ફરિયાદ પક્ષે ભચાઉના મદદનીશ સરકારી વકીલ ધર્મેન્દ્રસિંહ એસ. જાડેજા અને એમ.આર. જાડેજાએ દલીલો કરી હતી.