તારીખ ૪થી ડિસેમ્બર ૨૦૦૦નો એ દિવસ હતો. નિત્યક્રમ મુજબ પોતાની ચેમ્બરમાં આવેલા લોકલ ક્રાઈમ બ્રાન્ચના પોલીસ ઈન્સ્પેક્ટર દિલીપ આર.અગ્રવાતને બાતમી મળેલી કે ભુજના ગણેશનગરમાં મહાકાળી માતાજીના મંદિર નજીક એક યુવક ૫૦૦ ગ્રામ ચરસની ડિલિવરી આપવા આવવાનો છે. અગ્રાવતે તુરંત જ પંચોને બોલાવી, જરુરી ઠરાવ કરીને સવારે ૧૧.૩૦ના અરસામાં સ્થળ પર વૉચ ગોઠવી દીધી હતી.

હરેન્દ્ર મૂળ ઉત્તર પ્રદેશના મેનપુરી જિલ્લાના કરેલ તાલુકાના વિનાયકપુરનો વતની હતો અને ગણેશનગરથી થોડે દૂર મિરજાપરમાં કાનજીભાઈ વાલજીભાઈ હિરાણીના મકાનમાં ભાડે રહેતો હતો.

પોલીસે આરોપી વિરુધ્ધ NDPS Actની ધારાઓ તળે ગુનો દાખલ કરેલો અને કૉર્ટે તેને ભુજની જેલ (સરપટ નાકે આવેલી જૂની જેલ)માં ધકેલી દીધો હતો. આ ગુનામાં ૧૧-૦૧-૨૦૦૧ના રોજ પોલીસે આરોપી વિરુધ્ધ કૉર્ટમાં ચાર્જશીટ રજૂ કર્યું હતું. જો કે, પંદરમાં દિવસે એટલે કે ૨૬-૦૧-૨૦૦૧ના રોજ કચ્છમાં ભયંકર ભૂકંપ આવતાં જેલ તૂટી ગઈ હતી. જેલમાં કેદ અનેક કેદીઓ ‘કુદરતે આપેલા જામીન’ને વધાવી ફરાર થઈ ગયાં હતા. તેમાંનો એક હરેન્દ્ર પણ હતો.

સમય વીતતો ગયો. અનેક કેદી પરત ફર્યાં, અનેકને પોલીસે પકડ્યાં પરંતુ હરેન્દ્રનો કોઈ અતોપત્તો નહોતો મળતો. તેનો કેસ ઠેબે ચડેલો. કૉર્ટે તેને ડોરમેન્ટ કેસની ફાઈલમાં નાખી દીધેલો. પોલીસે યુપી જઈને તપાસ કરેલી. અનેકવાર પકડ વૉરન્ટ ઈસ્યૂ કરેલાં. તેને વૉન્ટેડ જાહેર કરેલો પરંતુ હરેન્દ્રનો આજ દિન સુધી કોઈ પત્તો મળ્યો નથી.

ગત વર્ષે કૉર્ટે આરોપીની ગેરહાજરીમાં તેની વિરુધ્ધ પુરાવો નોંધી કેસ ચલાવવાનો નિર્ણય કરેલો. અંતે ૨૫ વર્ષ અને ત્રણ મહિના બાદ ભુજની વિશેષ NDPS કૉર્ટના જજ વિરાટ એ. બુધ્ધાએ હરેન્દ્રને દોષી ઠેરવી ત્રણ વર્ષની કેદ અને પાંચ હજાર રૂપિયા દંડ ફટકાર્યો છે. કૉર્ટે હરેન્દ્રને પકડીને સજાનો અમલ કરાવવા માટે જેલભેગો કરવા હુકમ કર્યો છે. જો કે, હરેન્દ્ર જીવે છે કે મૃત્યુ પામ્યો છે, તે ક્યાં છે તેની કોઈને ખબર નથી.