ફરિયાદી પ્રેમજીભાઈ મૂળ નીલપર ગામનો વતની છે અને રાપરમાં રહીને વર્ષોથી દેના બેન્ક ચોકમાં સાવલા સિમેન્ટ એજન્સી નામથી સિમેન્ટનો વેપાર કરે છે. ગઈકાલે બપોરે પ્રેમજીભાઈ બાઈક પર ઘરેથી નીકળી સિમેન્ટ એજન્સી તરફ જતા હતા ત્યારે વિકાસવાડી સ્કુલ પાસે રસ્તામાં હાથ દેખાડીને સહદેવે તેમને અટકાવ્યાં હતા. સહદેવે અગાઉ પોતાની દુકાનેથી સિમેન્ટ ખરીદેલો હોઈ ફરિયાદી તેને ઓળખતો હતો.

સહદેવ અને મહિપત બેઉ જણે ‘તું હમણાં ચૂંટણીમાં અમને ઘણો નડતરરૂપ થયેલો, તને રૂપિયાનો પાવર છે, આજે તને છોડીશું નહીં’ તેમ કહીને બેઉ જણે ગળું પકડીને ફરિયાદીને લાફા અને મુક્કાથી મુઢ માર મારવાનું શરૂ કરેલું.

થોડાંક કલાકો બાદ સાંજે પાંચ વાગ્યે બેઉ જણ ફરી પ્રેમજીની દુકાને આવેલાં અને ‘ત્યાં તો ઘણાં લોકો ભેગાં થઈ ગયેલાં એટલે તું બચી ગયેલો, પરંતુ અહીં તો તને માર્યાં વગર નહીં મૂકીએ’ ફરી દુકાને માર મારેલો. સહદેવે ટેબલ પર પડેલું સ્ટેપલર મારતાં પ્રેમજીની જમણી આંખમાં ઈજા થયેલી. લોકો એકઠાં થતાં બેઉ જણ ત્યાંથી નાસી ગયેલાં.

રાપર પોલીસે જણાવ્યું બેઉ હુમલાખોરો હજુ ઝડપાયાં નથી. જિલ્લા પંચાયતની ગાગોદર બેઠક પર કોંગ્રેસ વતી નીલપર ગામના સરપંચ ભીખુભાઈ સોલંકી ઊભાં રહેલાં. ભીખુભાઈના સમર્થનમાં કામ કરવા બદલ પ્રેમજીભાઈ પર ભાજપ સાથે સંકળાયેલાં બેઉ જણે આ હુમલો કર્યો હોવાનું બહાર આવ્યું છે.