મહિલા કોંગ્રેસે પણ હોબાળો મચાવ્યો. આખરે પાંચમા દિવસે ફરિયાદ દાખલ થઈ ને પછી પોતાની કહેવાતી સ્ફૂર્તિ દેખાડવા માટે ૨૪ કલાકની અંદર આરોપીની ધરપકડ કરી આઈજી, એસપી, ડીવાયએસપી, પીઆઈના નામ સાથેની જશ ખાટતી પ્રેસ નોટ જારી કરાઈ!

રાપરની ૧૫.૫ વર્ષની માનસિક અસ્થિર બાળા ૧ જાન્યુઆરીના રોજ ઘરે હતી. તેના માતા પિતા મજૂરીકામ અર્થે બહાર હતા. તે સમયે નવાપરા વિસ્તારનો શિવા મોહનભાઈ કોલી નામનો ૨૯ વર્ષિય બૂટલેગર તેને લલચાવી ફોસલાવીને નજીકમાં આવેલા પેટ્રોલ પંપ પાછળની બાવળની ઝાડીઓમાં લઈ ગયો હતો.

દીકરીને રાપરની સરકારી હોસ્પિટલમાં લઈ જવાઈ. મેડિકલ ચેકઅપ કરાયું ત્યારે ખબર પડી તે દીકરી સાથે જઘન્ય કૃત્ય થયું છે.

ગુનાહિત કૃત્ય થયું હોય ત્યારે સરકારી હોસ્પિટલમાંથી સ્થાનિક પોલીસને મેડિકો લીગલ કેસ (એમએલસી) અંગે જાણ કરાતી હોય છે. પરંતુ, એક દિવસ વીત્યો, બીજો, ત્રીજો, ચોથો દિવસ વીત્યો. પોલીસે કોઈ કોગ્નિઝેબલ ઓફેન્સ દાખલ ના કર્યો. દરમિયાન, દીકરીની માતાનો વીડિયો વાયરલ થયો. જેમાં તે પોલીસ સમક્ષ ‘અમારે કોઈ ફરિયાદ નથી નોંધાવવી’ તેવું કહેતી જણાય છે.

મામલો સોશિયલ મીડિયા અને છાપાઓના પાને ચગે છે. જેને જોઈને મહિલા કોંગ્રેસના કાર્યકરો રાપર દોડી જાય છે. પીડિત બાળા પોતાની સાથે શું થયું તેનું વર્ણન કરે છે તે વીડિયો પણ વાયરલ થાય છે.

પછી ભીંસમાં આવેલી પોલીસ મંગળવારે સાંજે બાળાની માતાની ફરિયાદ દાખલ કરે છે. ભારતીય ન્યાય સંહિતાની કલમ ૬૪ (૨) (I) (K) (માનસિક અસ્થિર સ્ત્રી સાથે દુષ્કર્મ તથા પોક્સો એક્ટની કલમ ૪,૬,૧૮ હેઠળ ગુનો દાખલ કરી પોલીસ આરોપી શિવા મોહનભાઈ પારકરા (કોલી) (રહે. નવાપરા, રાપર, મૂળ રહે. કાનપર)ની ચોવીસ કલાકમાં ધરપકડ કરે છે. શિવા સામે ભૂતકાળમાં આડેસર પોલીસ મથકે દેશી દારૂના વેચાણના બે ગુના નોંધાયેલાં છે.

આ બનાવે અનેક સવાલ સર્જ્યાં છે. પોલીસ સમક્ષ ‘કોગ્નિઝેબલ ઓફેન્સ’ જાહેર થાય, તેમાંય ૧૬ વર્ષથી ઓછી વયની બાળા ગુનાનો ભોગ બની હોય ત્યારે જો કોઈ ફરિયાદ નોંધાવવા તૈયાર ના હોય તો પોલીસે સરકાર તરફે ફરિયાદી બનીને ગુનો દાખલ કરવો પડે તેવો કાયદાકીય પ્રબંધ છે.

ગામ આખામાં હોબાળો સર્જાય, વિવિધ વીડિયો વાયરલ થાય પછી કાર્યવાહી કરાય તેમાં પોલીસની પ્રજાના રક્ષક તરીકેની આબરુ  કેટલી રહે? રાપરના પીઆઈ બુબડીયાની કાર્યવાહી પર અગાઉ પણ અન્ય વિવિધ બનાવોમાં આરોપો થયેલાં છે અને એક કિસ્સામાં હાઈકૉર્ટે તેમને તત્કાળ અસરથી સસ્પેન્ડ કરવા મૌખિક હુકમ કરેલો. છતાં, બુબડીયા પીઆઈ તરીકે ફરજરત છે.