પોલીસને જોઈ વાહન ચાલકે ગાડી થોભાવવાના બદલે ગળપાદર જેલના રોડ પર પૂરઝડપે હંકારવાનું શરૂ કરેલું. જેથી પોલીસે પીછો કરીને, રોડ પર અન્ય એક ખાનગી વાહનની આડશ ઊભી કરી પીક અપ ડાલાના ચાલક બકાભાઈ ઊર્ફ બકુલ શક્તાભાઈ ભરવાડ (ઉ.વ. ૩૦, રહે. ગોપાલનગર, અંતરજાળ, આદિપુર મૂળ રહે. થરા, બનાસકાંઠા)ને આંતર્યો હતો.

પોલીસે ૩૧.૨૦ લાખના મૂલ્યના રમની ૨૪૦૦ બાટલીઓ સાથે GJ-13 AX-2063 નંબરનું પીક અપ વાહન, મોબાઈલ ફોન, રોકડ રકમ વગેરે મળી ૩૬.૨૫ લાખનો મુદ્દામાલ કબજે કરી બકુલ અને રણમલ બેઉ વિરુધ્ધ ગાંધીધામ એ ડિવિઝન પોલીસ મથકે પ્રોહિબિશનની ધારાઓ તળે ફરિયાદ નોંધાવી છે. દરોડામાં પીઆઈ એન.એન. ચુડાસમા, પીએસઆઈ ડી.જી. પટેલ સહિતનો સ્ટાફ જોડાયો હતો.

ગાંધીધામના પડાણા નજીક પંચરત્ન માર્કેટ પાછળ આવેલા વાડામાં દરોડો પાડીને પોલીસે ૮.૬૨ લાખનો શરાબનો જથ્થો જપ્ત કર્યો છે.

સ્થળ પરથી પોલીસે સ્વરૂપસિંગ ચૌહાણ, પ્રવિણસિંહ ચૌહાણ (બંને રહે. મૂળ રાજસ્થાન) અને રોહિત તાંડીલકર, અજય મરાવી, સુરજીતસિંગ વરકડે (ત્રણે રહે. મધ્યપ્રદેશ)ની ધરપકડ કરી હતી.

પોલીસે તમામ લોકો સામે ગુનો દાખલ કરીને કાર, પાંચ ફોન મળી ૧૦.૮૭ લાખનો મુદ્દામાલ જપ્ત કર્યો છે. ઝડપાયેલો સ્વરુપસિંગ અગાઉ ૧૫-૦૨-૨૦૨૫ના રોજ અંજાર પોલીસે આ જ રીતે એક વાડામાં દરોડો પાડીને પકડેલાં ૯.૨૪ લાખના ગુનામાં પોલીસ ચોપડે ચઢી ચૂકેલો છે. દરોડાની કામગીરીમાં ગાંધીધામ બી ડિવિઝન પીઆઈ એસ.વી. ગોજીયા, પીએસઆઈ એલ.એન. વાઢીયા અને સર્વેલન્સ સ્ટાફ જોડાયો હતો.

લાકડીયામાં પોલીસ સ્ટેશનથી માંડ એક કિલોમીટર દૂર મોમાય માતાજીના મંદિર નજીક અવાવરુ જગ્યાએથી રીટ્ઝ કારમાં રહેલી ૧.૪૨ લાખની કિંમતની દારૂની ૭૨ બાટલી સાથે જયંતી ભીખાભાઈ કોલી (રહે. પગીવાસ, લાકડીયા)ને ઝડપી પાડ્યો છે. કારની પાછલી સીટ પર રહેલી બે ટ્રૉલી બેગમાં દારૂની બાટલીઓ સંઘરવામાં આવી હતી.

પોલીસે શરાબ ઉપરાંત કાર, મોબાઈલ ફોન વગેરે મળી ૨.૯૭ લાખનો મુદ્દામાલ કબજે કરી જયંતી કોલી અને ભરત રાવલ વિરુધ્ધ ગુનો દાખલ કર્યો છે. જયંતી વિરુધ્ધ અગાઉ લાકડીયા અને ભચાઉમાં મારામારી, વાહન ચોરી, હથિયારબંધીના જાહેરનામાના ભંગ, ઘરફોડ ચોરી સહિતના પાંચ ગુના નોંધાયેલાં છે. કામગીરીમાં પીઆઈ જે.એમ. જાડેજા અને સ્ટાફ જોડાયો હતો.