૨૭-૧૧-૨૦૨૩ના રોજ રાપરના ત્રંબૌ ત્રણ રસ્તા પાસે આવેલા નાયરા પેટ્રોલ પંપના બે કર્મચારી કે જે બાઈક પર પંપના વકરાના ૧૨.૭૯ લાખ રોકડાં રૂપિયા થેલામાં લઈને બેન્કમાં જમા કરવા જતા હતા ત્યારે પૂર્વ આયોજીત ષડયંત્ર રચીને બે બાઈક સવારે તેમને રસ્તામાં આંતરીને, છરીથી હુમલો કરીને રૂપિયા ભરેલો થેલો લૂંટી લીધો હતો.

લૂંટની ઘટના સંદર્ભે નીતિનની બહેન ખીમીબેન ખોડાભાઈ ભલાણીએ ૦૧-૦૧-૨૦૨૪ના રોજ રાપર કૉર્ટમાં ફરિયાદ દાખલ કરેલી કે આ ગુનામાં રાપરના પીઆઈ સહિતના પોલીસ કર્મીઓએ તેના માતા, પિતા, બે બહેનો અને ભાઈ નીતિનને પોલીસ સ્ટેશનમાં આઠ કલાક સુધી ગેરકાયદે રીતે ગોંધી રાખીને ઢોર માર મારેલો.  

રાપર કૉર્ટે આ બાબતે ઈસ્યૂ કરેલી નોટિસની બજવણી કરવા ભાઈ નીતિન પોલીસ સ્ટેશને રૂબરૂ જતા પોલીસે તેને આરોપી બતાડીને અટક કરીને ઢોર માર મારેલો. પોલીસે નીતિનને કૉર્ટમાં રજૂ કર્યો ત્યારે તેને શરીરે કોઈ ઈજા ના હોવાનો રાપર સામૂહિક આરોગ્ય કેન્દ્રના મેડિકલ ઑફિસરે રજૂ કરેલો રીપોર્ટ પોલીસે કૉર્ટ સમક્ષ રજૂ કરેલો.

પોલીસ અને સરકારી ડૉક્ટરે એકસંપ થઈને અગાઉ મેડિકલ રીપોર્ટ ખોટો આપ્યો હોવાનો, ફરજમાં બેદરકારી દાખવી હોવાનો ખીમીબેને કૉર્ટમાં રજૂઆત કરી હતી.

ફરિયાદ અન્વયે કૉર્ટે પોલીસ સ્ટેશનના સીસીટીવી કેમેરાના ફૂટેજ અને સ્ટેશન ડાયરી રજૂ કરવા હુકમ કરેલો. પરંતુ, પોલીસે આરોપી તેમના કબજામાં ના હોવાનું, પૂછપરછના હેતુથી તેમને પોલીસ સ્ટેશન બોલાવ્યાં હોવાનું અને બાદમાં છોડી મુક્યાં હોવાનું, સીસીટીવી કેમેરા બંધ હોઈ ફૂટેજ ઉપલબ્ધ ના હોવાનું કૉર્ટને જણાવ્યું હતું.

પોલીસે પુરાવાનો નાશ કર્યો છે. કૉર્ટે કહ્યું કે પીએસઓએ રજૂ કરેલો રીપોર્ટ કૉર્ટને ગેરમાર્ગે દોરતો ખોટો હોવાનું અને ચોક્કસ ગુનો છૂપાવવા માટેના પ્રયત્નો હોવાનું માનવાને કારણ રહે છે. પીઆઈએ પણ તેમના સોગંદનામા સાથે એવિડન્સ એક્ટ મુજબ સોગંદનામું રજૂ કર્યું નથી.

 કૉર્ટે તત્કાલિન પીઆઈ વી.કે. ગઢવી, પોલીસ કર્મચારી મુકેશ ઠાકોર, કમલેશ ચાવડા, અશોક યાદવ સામે ઈપીકો કલમ ૩૨૩, ૨૯૪ (ખ), ૫૦૬ (૨), ૧૧૪, ૨૦૧, ૧૧૬ (એ),  ૧૭૫, ૧૯૩, ૧૯૬, ૧૯૭ મુજબ ન્યાયીક કાર્યવાહી ચલાવવા હુકમ કર્યો છે.

રાપર સામૂહિક આરોગ્ય કેન્દ્રના તત્કાલિન મેડિકલ ઑફિસરે ખોટો મેડિકલ રીપોર્ટ રજૂ કર્યો હોવાના આરોપના આધારે તેમની વિરુધ્ધ ઈપીકો કલમ ૧૯૬, ૧૯૭, ૧૯૮ હેઠળ ગુનો નોંધી કાર્યવાહી ચલાવવા હુકમ કરાયો છે.