ભચાઉના પ્રાંત અધિકારી અને કચ્છ કલેક્ટરે ભૂમાફિયાઓ સાથે ભળી જઈ, ભ્રષ્ટાચાર આચરીને તેમની તરફેણમાં હુકમ કર્યો હોવાનો રામજી કટુઆ નામના એડવોકેટે આરોપ કર્યો છે. કટુઆએ આરોપ કર્યો કે જમીન જવેરબેન ધના ગાલા અને મોંઘીબેન ધના ગાલા આ જમીનના અસલી માલિક છે.

૨૦૨૩માં ભૂમાફિયાઓએ બોગસ આધારો ઊભાં કરીને જમીનનો બારોબાર વેચાણ દસ્તાવેજ બનાવી ખોટી નોંધ પડાવી દીધી હતી. તે અંગે ભચાઉ પ્રાંત અધિકારીની કૉર્ટમાં તકરારી કેસ દાખલ કરાયેલો અને પ્રાંત અધિકારીએ અસલી માલિકની તરફેણમાં હુકમ કરી વેચાણ નોંધ રદ્દ કરતો હુકમ કરેલો.

થોડાંક સમય બાદ ભૂમાફિયાઓએ જવેરબેનના મરણનું ખોટું પ્રમાણપત્ર રજૂ કરીને આ જમીનમાં વારસાઈ કરાવી દીધી હતી. જે મરણ પ્રમાણપત્ર રજૂ કરાયેલું છે તે મહારાષ્ટ્રનું છે અને તેના સિરિયલ નંબરના આધારે ઓનલાઈન ખરાઈ કરતાં સ્પષ્ટ રીતે મૃતકનું નામ જેનેરી જેવાભાલ છેડા લખેલું છે. ભૂમાફિયાઓએ અસલ પ્રમાણપત્રમાં ચેડાં કરીને જવેરબેનના નામનું મરણ પ્રમાણપત્ર તૈયાર કરી વારસાઈ કરાવી હોવાની રજૂઆત કરાયેલી. પ્રાંત અધિકારીએ ભૂમાફિયાઓની તરફેણમાં હુકમ કરતાં કચ્છ કલેક્ટર સમક્ષ અપીલ કરાયેલી. બધા આધાર પુરાવા રજૂ કર્યા છતાં કચ્છ કલેક્ટરે પણ પ્રાંત અધિકારીનો હુકમ માન્યો રાખતાં નારાજ વકીલે ભ્રષ્ટાચાર સહિતના આરોપ કર્યાં છે.

આરોપ સંદર્ભે કચ્છ કલેક્ટર અનિલ રાણાવસિયાએ ખુલાસો કરતાં જણાવ્યું કે કોઈ દસ્તાવેજ સાચો છે કે નકલી તે ખરાઈ કરવાની સત્તા મહેસુલી કૉર્ટને નહીં પરંતુ સિવિલ કૉર્ટને છે. આ અંગે અરજદારે કોઈ ફોજદારી ફરિયાદ નોંધાવી નથી કે સિવિલ કૉર્ટમાં દાવો કર્યો નથી.

વકીલ તરીકે હાજર થયેલાં શખ્સે વકીલાતનામામાં ખોટી સહી કરી હોવાનું જણાઈ આવતા અરજદારના વકીલ અને અન્ય વાંધેદારની સંડોવણી ચકાસી વિગતવાર અહેવાલ SIT સમક્ષ રજૂ કરવા પાત્ર છે કે કેમ તે અંગે વિગતવાર અહેવાલ તૈયાર કરી ભચાઉ મામલતદારને આપવા સૂચના અપાઈ છે.

મહેસુલી કૉર્ટમાં ચાલેલા કેસ દરમિયાન અરજદાર એકપણ મુદ્દતે હાજર નથી રહ્યાં તે પણ સૂચક હોવાનું કલેક્ટરે ઉમેર્યું છે.