ઈશ્વરે જણાવ્યું કે તેમનો પુત્ર બીમાર હતો. તેને સરકારી દવાખાને લઈ જઈ દવા ગોળી લીધાં હતાં. ઘરે પરત ફરતી વખતે હાઈવે પર આવેલી મિત્રની ચાની હોટેલમાં પુત્રને બેસાડીને પોતે ખેતરે મજૂરી કરવા ગયેલો. થોડીકવાર બાદ હોટેલ પર ગામનો તુલસી કોલી નામનો છોકરો આવેલો. તુલસી તેમના પુત્રને હોટેલથી લઈ નીકળી ગયેલો. બસ, ત્યારથી બેઉનો કોઈ અતોપત્તો નથી.

પોલીસે ફરિયાદ નોંધ્યા બાદ સૌપ્રથમ હોટેલ પર તપાસ કરી તો ત્યાં કામ કરતાં એક છોકરાએ પોલીસને જણાવ્યું કે બેઉ જણને ગાંધીધામ તરફના વાહનમાં બેસીને જતાં જોયા હતાં.

તપાસમાં સ્પષ્ટ થયું કે કિશોર ઈન્સ્ટાગ્રામનો પણ ઉપયોગ કરે છે અને અવારનવાર તેમાં રીલ્સ બનાવીને અપલોડ કર્યાં કરે છે. પોલીસે લાપત્તા કિશોરની ઈન્સ્ટાગ્રામ આઈડીને ફૉલો કરી ચેક કરતાં એક રીલ્સ જોવા મળેલી.

પોલીસે ઈલાઈટ હોટેલમાં જઈ તપાસ કરતાં જાણવા મળ્યું કે પહેલી તારીખે તુલસી કિશોરને લઈ હોટેલમાં નોકરી કરવા આવેલો. હોટેલ મેનેજમેન્ટે તુલસીને નોકરીએ રાખેલો પરંતુ કિશોરની વય નાની હોઈ તેને નોકરીએ રાખવાની ના પાડી દીધેલી. તુલસીએ બે દિવસ સુધી હોટેલમાં નોકરી કરેલી અને કિશોરને પોતાની સાથે રૂમમાં રાખ્યો હતો. તુલસી કિશોરને નોકરીએ રખાવવાની લાલચ આપીને પોતાની સાથે લાવ્યો હતો.

બંનેની મૂવમેન્ટને સતત ટ્રેક કરી રહેલી પોલીસે બેઉને ગાંધીધામ બસ સ્ટેશનથી દબોચી લઈ પરત તેમના વાલીઓને સુપરત કરી દીધાં છે. ગાગોદર પીઆઈ વી.એ. શેંગલ અને પોલીસ સ્ટેશનના સ્ટાફે સમગ્ર મામલાને ગંભીરતાથી લઈ ચાર જ દિવસમાં બેઉ લાપત્તા બાળકોને શોધી કાઢ્યાં છે.