ઈન્ટીગ્રેટેડ કાઉન્ટર UAS ગ્રીડ અને એર ડિફેન્સ સિસ્ટમથી ભારતીય સૈન્ય દળોએ પાક.ના હુમલાના પ્રયાસને નિષ્ફળ બનાવ્યો છે. ભારતીય સૈન્ય દળો દ્વારા તોડી પડાયેલાં ડ્રોન અને મિસાઈલ્સના કાટમાળને એકત્ર કરાઈ રહ્યો છે, જે પાકિસ્તાને હુમલો કર્યો હોવાનું સાબિત કરે છે.

પ્રેસ ઈન્ફોર્મેશન બ્યૂરૉ દ્વારા જારી કરાયેલી સત્તાવાર માહિતી મુજબ પાકિસ્તાનના અડપલાંનો જવાબ આપવા આજે સવારે ભારતીય સશસ્ત્ર દળોએ પણ પાકિસ્તાનના વિવિધ વિસ્તારોમાં આવેલા એર ડિફેન્સ રડાર અને સિસ્ટમને નિશાન બનાવી તેને નષ્ટ કરી દીધી છે. ભારતીય સૈન્યએ લાહોરની એર ડિફેન્સ સિસ્ટમને નષ્ટ કરી નાખી છે. પાકિસ્તાને કરેલાં હુમલા જેટલી જ તીવ્રતાનો આ જવાબી હુમલો હોવાનું ભારતે જણાવ્યું છે.

‘ઓપરેશન સિંદૂર’ બાદ પાકિસ્તાને જમ્મુ કાશ્મિરમાં એલઓસી નજીક આવેલા કૂપવાડા, બારામુલ્લા, ઉરી, પુંચ, મેંઢર, રાજૌરી વગેરે વિસ્તારોમાં વિનાકારણ અંધાધૂંધ તોપમારો શરૂ કરતાં ૩ મહિલા અને ૫ બાળકો સહિત ૧૬ નિર્દોષ નાગરિકોના મૃત્યુ થયાં છે. ભારતીય સૈન્ય પણ પાક.નો મજબૂતાઈથી પ્રતિકાર કરી રહ્યું છે.