૨૦૨૦થી પૂર્વ કચ્છ પોલીસ દળમાં વાય.કે. ગોહિલે આડેસર, સામખિયાળી, દુધઈ અને ગાંધીધામ શહેર ટ્રાફિકમાં પોલીસ સબ ઈન્સપેક્ટર તરીકે ચારેક વર્ષ સુધી ફરજ બજાવી હતી. ૦૧-૦૮-૨૦૨૪ના રાજ્યના ૨૩૩ પીએસઆઈની પીઆઈ તરીકે સામૂહિક બઢતી અંતર્ગત પીઆઈ તરીકે બઢતી થયાં બાદ ગોહિલે ગાંધીધામ સાયબર ક્રાઈમ પોલીસ સ્ટેશનમાં ફરજ બજાવી હતી. થોડાંક માસ પૂર્વે જ ગોહિલની ટંકારા ખાતે બદલી થઈ હતી.

‘ટંકારા જુગારધામ પ્રકરણમાં આરોપીએ ખોટું નામ આપ્યાનો ખુલાસો’ મતલબના સમાચાર અખબારોમાં પ્રગટ થતાં રાજ્ય પોલીસ વડાએ તત્કાળ SMCને ગુપ્ત રાહે તપાસ સોંપી હતી. જેમાં જુગારની બોગસ રેઈડ અને તોડકાંડનો પર્દાફાશ થયો છે.

૨૬ ઓક્ટોબરના રોજ ગોહિલ અને તેમની ટીમે ટંકારા રાજકોટ હાઈવે પર આવેલા કમ્ફર્ટ રીસોર્ટના રૂમમાં રેઈડ કરી ૭ આરોપીને વિવિધ રંગ અને મૂલ્ય લખેલાં ટોકનની લેવડદેવડથી તાશના પત્તાથી જુગાર રમતાં ઝડપ્યાં હતાં. રીસોર્ટના પાર્કિંગમાં પડેલી એક ફોરચ્યુનર કારમાં હાજર વિમલ પાદરીયા અને ડ્રાઈવર ગોપાલ સભાડને ૧૨ લાખ રૂપિયા આપીને સાતે જણ ટોકન મેળવીને જુગાર રમતાં હોવાનો ગુનો દાખલ કરેલો. પોલીસે કુલ નવ લોકોની ધરપકડ દર્શાવી અને એક જણને સ્થળ પર હાજર ના મળ્યો હોવાનું ફરિયાદમાં જણાવેલું.

દરોડા બાદ મહિપત સોલંકી અને ગોહિલે તીરથ ફળદુ તથા વિમલ પાદરીયા નામના શખ્સો પાસે અલગ અલગ રીતે વાતચીત કરી જુગારનો કેસ ના કરવા અને દરોડામાં બીજા લોકોના નામ દર્શાવી દઈશું કહીને નાણાં માંગેલાં. મહિપતે તીરથ પાસે પંદર લાખ અને ગોહિલે વિમલ પાદરીયા પાસે બાર લાખ માગેલાં. વાતચીત મુજબ વિમલ પાદરીયાએ રાજકોટ રહેતાં તેના મિત્ર સુમિત અકબરીને ફોન કરીને રોકડાં બાર લાખ મગાવેલાં. સુમિતે આ નાણાં કોન્સ્ટેબલ કૃષ્ણરાજને આપી દીધેલાં.

બાર લાખ રોકડાં મળ્યાં બાદ ફોરચ્યુનર સહિત તમામ નવે જણને મધરાતે પોલીસ મથકે લઈ જઈ લૉકઅપમાં પૂરી દેવાઈને તેમના મોબાઈલ ફોન જપ્ત કરી લેવાયાં હતાં. મધરાતે તીરથના પિતા અશોકના વારંવાર ફોન આવવાનું શરૂ થયેલું. ગોહિલ અને મહિપતે તીરથને લૉકઅપમાંથી બહાર કાઢી, બહાર રોડ પર લઈ જઈને દમ મારેલો કે ‘બોલ શું કરવું છે? તને લૉકઅપ પૂરીને તારા બાપને વીડિયો કૉલ કરીને બતાડું કે તું જુગાર રમતાં પકડાયો છે?’

તીરથે ઝડપાયેલાં અન્ય લોકો સાથે વાતચીત કરીને ૪૧ લાખ રૂપિયા આપવાની સહમતિ દર્શાવેલી. આંકડો નક્કી થયાં બાદ તીરથે તેના મિત્ર પંકજ દેત્રોજાને રોકડાં રૂપિયા લઈને પોલીસ સ્ટેશને બોલાવેલો. પંકજે રાત્રે જ ૪૧ લાખ રોકડાં રૂપિયા ભરેલો થેલો લઈ આવીને પોલીસ કર્મચારીઓને આપી દીધો હતો.

ગોહિલ અને મહિપતે તીરથ બાદ વિમલ પાદરીયા પાસે ચોપડે નામ બદલીને ઝડપથી જામીન કરાવી આપવાના નામે વધુ દસ લાખ માંગેલાં. વિમલ પાદરીયાએ તેના મિત્ર સુમિત મારફતે રાત્રે જ દસ લાખની વ્યવસ્થા કરીને ગોહિલની હાજરીમાં હેડ કોન્સ્ટેબલ મહિપતને આપી દીધાં હતાં. તોડ થયા બાદ ફરિયાદમાં તીરથ અશોકભાઈ ફળદુના બદલે રવિ મનસુખભાઈ પટેલ (રહે. રવાપર, મોરબી), વિમલ રામજીભાઈ પાદરીયાની ખોટી અટક પટેલ દર્શાવાયેલી. ભાસ્કર પારેખ નામના શખ્સનું સરનામું ખોટું લખીને, મોબાઈલ ફોન પરત આપીને તેના ડ્રાઈવર ગોપાલનો ફોન ચોપડે પર કબજે કરાયો હતો. જો કે, સમગ્ર રેઈડ જ બોગસ હોવાનું અને ખોટાં આધાર પૂરાવા ઊભાં કરીને ગોહિલ અને મહિપતે તોડ કર્યો હોવાનું ખૂલ્યું છે.