જેના પગલે તેમણે નલિયાના ઘોડા સર્કલ ખાતે એક ટીમને મોકલી આપી આ કાર અટકાવવા સૂચના આપી હતી. જખૌ મરીનના પીએસઆઈ બી.પી. ખરાડી અને તેમનો સ્ટાફ પણ સ્થળ પર દોડી આવ્યો હતો. દરમિયાન, બાતમી મુજબની સફેદ રંગની GJ-23 AF-5900 નંબરની અર્ટિગા કાર પસાર થતાં પોલીસે તેને અટકાવી હતી.

પોલીસ કારને ચેક કરતાં વ્હિસ્કી ભરેલી અડધી બોટલ મળી આવી હતી. રણજીત પાસે ડ્રાઈવીંગ લાયસન્સ પણ નહોતું. બેઉ સામે નલિયા પોલીસે નશાબંધી અને મોટર વેહિકલ એક્ટની ધારાઓ તળે ગુનો દાખલ કર્યો હતો. જો કે, દારૂની બાટલી તેમણે કોની પાસેથી ક્યારે મેળવી હતી તે અંગે ફરિયાદમાં કશો ફોડ પડાયો નથી.

મતલબ કે, કોન્સ્ટેબલ સામે ભલે પીવાનો કેસ ઠોકાય પણ બૂટલેગરનો વાળ વાંકો ના થવો જોઈએ! પોતાને કચ્છ અને ગુજરાતનો મોટા ભા માની બેઠેલાં એક જન પ્રતિનિધિની ગુડ બૂકમાં રહેવા તેની જોડે કલાકો સુધી બેઠકો કરતાં કે ગુનાહિત ભૂતકાળ ધરાવતાં અને માધાપરમાં પ્રકાશ ફેલાવતાં એક હોટેલના ધંધાર્થી તથા માધાપરથી લેર રોડ પર આવેલા એક નામીચા રીસોર્ટનો ઑનર કે જે બેઉ જણ શરાબ, કબાબ અને શબાબ માટે આખા કચ્છમાં કુખ્યાત છે તેમની સાથે દોસ્તી કેળવીને તેમને ત્યાં અવારનવાર પાર્ટી કરવા જતાં કેટલાંક ભ્રષ્ટ અધિકારીઓ હવે પોતાની રહી સહી આબરૂના પણ ધજાગરા ઉડાડી રહ્યાં છે.

માંડવી પોલીસે ગત રાત્રે પોણા 11ના અરસામાં શ્યામજી કૃષ્ણવર્માના મૂળ નિવાસસ્થાન નજીક આવેલી ગાયત્રી ફૂડ ઝોન નામની દુકાનમાં દરોડો પાડીને આશિષ જેન્તીલાલ શાહ નામના શખ્સને દારૂ પીધેલી હાલતમાં ઝડપી પાડ્યો હતો. પોલીસને બાતમી મળી હતી કે દુકાન માલિક આશિષ શાહ (ઉ.વ. 48, રહે. લોહાર ચોક, માંડવી) દુકાનમાં દારૂનું વેચાણ કરે છે. જો કે, દરોડા દરમિયાન આશિષે પોતે પીધેલી અને ખાલી થવા આવેલી વ્હિસ્કીની એક બાટલી સિવાય પોલીસને બીજું કંઈ વાંધાજનક મળ્યું નહોતું. સૂત્રોમાંથી મળતી માહિતી મુજબ આશિષ શાહ હોમગાર્ડ દળમાં ઑફિસર ઈન કમાન્ડિંગ તરીકે નોકરી કરે છે.