બાતમીના આધારે SMCની ટીમે આણંદ તરફ જતા નેશનલ હાઈવે પર દુમાડ ચોકડીએ દારુ ભરેલી ટ્રક ઝડપી હતી.

જો કે, બાતમી સચોટ હોઈ SMCએ ભૂસું ભરેલાં મિણીયાના કોથળા કઢાવતાં તેની પાછળ છૂપાવેલી ૬૨.૧૯ લાખના દારૂની ૩૯૮ પેટીઓ મળી આવી હતી. ટ્રકમાંથી દારુ ઉપરાંત ૩.૫૭ લાખનું ભૂસું ભરેલાં ૫૯૫ કોથળા, બે ફોન, ૧૫ લાખનું વાહન મળી કુલ ૮૦.૮૨ લાખનો મુદ્દામાલ કબજે કરાયો છે.

ડ્રાઈવર સતવીરસિંઘ વાલ્મીકિ (રહે. ઝજ્જર, હરિયાણા)એ પ્રાથમિક પૂછપરછમાં જણાવ્યું કે તે વર્ષોથી ટ્રક ડ્રાઈવર તરીકે નોકરી કરે છે. ઝજ્જરમાં તે અવારનવાર ટાયર પંક્ચર રીપેરીંગ અને સર્વિસની દુકાને જતો હતો અને દુકાનદાર ઋષિરાજ સાથે તેનો પરિચય થયેલો.

પુત્રની સ્કુલ ફી ભરવાની હોઈ નાણાંની જરૂરિયાત ઊભી થતાં તેણે ઋષિરાજને દારૂની ખેપ મારવા તૈયાર હોવાનું જણાવેલું. જેથી ઋષિરાજ સતવીર અને કો ડ્રાઈવર મનજીત શર્માને ટ્રક આપી સોનીપત લઈ ગયેલો.

ઋષિરાજે ડ્રાઈવરને જણાવેલું કે સોનીપતની હાઈવે હોટેલ પર ટ્રક લઈને રાહ જોજે. એક માણસ આવશે અને ‘જયશ્રી રામ’ એવો કોડવર્ડ બોલે એટલે તેને ટ્રક સોંપી દેજે. આ માણસ ટ્રકમાં માલ લોડ કરીને પરત હોટેલ પર આપી જશે. બીજા દિવસે કો ડ્રાઈવર મનજીત શર્માને ઋષિરાજના પાર્ટનર રાકેશ જાટે આજે માણસ આવીને ટ્રકમાં માલ લોડ કરી આપશે તેમ જણાવેલું. સૂચના મુજબ અજાણ્યો માણસ ટ્રક લઈ ગયેલો અને ભૂંસાની આડમાં શરાબ લોડ કરીને ટ્રક આપી ગયો હતો. ઋષિરાજે સતવીરને ફરી ઝજ્જર બોલાવી ગાંધીધામથી ઔરંગાબાદની બિલ્ટી આપી હતી.

ઋષિરાજે સતવીરને જણાવેલું ગાંધીધામ પહોંચવાના ૨૦ કિલોમીટર પહેલાં મને ફોન કરી જાણ કરજે. જેથી માલ કોને ક્યાં આપવાનો છે તેની વિગત જણાવીશ. દારૂની આ ખેપ પેટે સતવીર અને સહ ડ્રાઈવર મનજીત શર્માને ૩૦ હજાર રૂપિયા મહેનતાણું મળવાનું હતું, જે બેઉ જણ અડધું અડધું વહેંચી લેવાના હતા. ઝડપાયેલાં બેઉ ડ્રાઈવર સહિત દારૂ મોકલનાર ઋષિરાજ અને તેના પાર્ટનર રાકેશ જાટ, ટ્રકના માલિક, માલ મગાવનાર ગાંધીધામના અજાણ્યા બૂટલેગર વગેરે સામે છાણી પોલીસ મથકે ફરિયાદ નોંધાવાઈ ેછે.