પ્રદેશ કોંગ્રેસ પ્રમુખ શક્તિસિંહ ગોહિલે જણાવ્યું છે કે ફી વધારાના લીધે વાલીઓ અને વિદ્યાર્થીઓ મોટી આર્થિક ચિંતામાં મૂકાઈ ગયાં છે.

ગોહિલે આ તોતીંગ ફી વધારો સત્વરે પાછો ખેંચવા મુખ્યમંત્રી અને આરોગ્યમંત્રીને રજૂઆત કરી છે. જેથી સામાન્ય અને મધ્યમ વર્ગના તેજસ્વી છાત્રોનું ડૉક્ટર બનવાનું સ્વપ્ન સાકાર થઈ શકે. ગુજરાતમાં મોટા પાયે ડૉક્ટરો, સ્પેશ્યાલિસ્ટ ડોક્ટરો, પેરા મેડીકલ સ્ટાફ, નર્સીસ સહિતના તબીબી ક્ષેત્રે માનવબળની મોટાપાયે ઘટ છે. 

ગોહિલે આરોપ કર્યો છે કે સરકારી મેડિકલ કોલેજની ફીને લઈ ગત વર્ષની માફક આ વખતે વાલીઓનો વિરોધ જ ન થાય તેવા બદઈરાદાપૂર્વક સરકારે પ્રવેશ પહેલાં જ તોતિંગ ફી વધારો જાહેર કર્યો છે.

મહત્વની વાત એ છે કે મેડીકલ કોલેજોની ફીમાં ગત વર્ષે ર૦ જુલાઈના રોજ જે ફી વધારા સાથેનો પરિપત્ર પ્રસિધ્ધ કરાયો હતો તેમાં માત્ર તારીખ જ બદલવામાં આવી છે, બાકી કોઈ ફેરફાર કરાયો નથી! એક તરફ દિવસે ને દિવસે મેડીકલનું શિક્ષણ મોઘું થઈ રહ્યું છે. ગરીબ અને સામાન્ય વર્ગના બાળક માટે ડોક્ટર બનવું એક માત્ર સપનું જ છે, ત્યારે હવે ફરી તોતિંગ ફી વધારો ઝીંકી સામાન્ય-મધ્યમ પરિવારના બાળકો માટે પણ તબીબી-શિક્ષણનો રસ્તો સાવ બંધ કરી દેવાયો છે. આગામી દિવસોમાં ફી વધારો પાછો નહિ ખેંચાય તો કોંગ્રેસ પક્ષની વિદ્યાર્થી પાંખ એન.એસ.યુ.આઈ. આંદોલન કરશે.